Yn bteng ka Jowai Smart Town ban mad iaka jingeh ki ñiut, mih pyrshah u paidbah haka public hearing ha Thadmusem

Syllad | The Rising MeghalayaMarch 4, 2022

Ka sor Jowai kaba la angnud ka sorkar ban pynkylla iaka kum ka ‘Smart Town’ kan bteng ban mad iaka jingeh jong ki ñiut, hadien ba u paidbah jong ki bun bun tylli ki shnong ha Elaka Nartiang kila mih paidbah ban pyrshah iaka jaka bret ñiut thymmai ka Jowai Municipal Board (JMB) ha Mooshutsdai, ka jaka kaba hap ha Thadmusem haka sngi Thohdieng.

Ka bor synshar district jong ka West Jaintia Hills District kala khot ia kane ka public hearing khnang ban shna iaka jaka bret ñiut thymmai ha Mooshutsdai, Mookabeng.

Kane ka jaka ka dei jong ka Baiamonlang Shylla kaba heh haduh 100 acres kaba tnad pynroi sor ne ka Urban Affairs jong ka sorkar kala jied ia kane ka jaka ban shna iaka jaka bret ñiut iaka sor Jowai bad ki jaka kiba hap hapoh ka Jowai Municipal Board katkum ka kyndon jong ka Solid Waste Management Rules, 2016.

U Deputy Commissioner, West Jaintia Hills District Ma Garod LSN Dykes ula pyniaid ia kane ka public hearing ha ryngkat ka jingiadonlang ki ophisar ka tnad pynroi sor bad kiwei kiwei.

Ki nongshong shnong kiba kynthup na ka shnong Nongkhroh, Thadmusem, Larnai bad Sohphoh  ha ryngkat ki katto katne ki sengbhalang ki la pynpaw ïa la ka jingpyrshah jong ki ha ka jingïalang pynsngew paidbah ne ka public hearing.

La ïoh ka jingkren na ki 30 ngut ki nongpyrshah kumjuh ki nongkyrshan.

Baroh ki nongkren da kajuh ka sur ki la pynsngew ïaka jingpyrshah jong ki, ïa kane ka jingthmu ban shna iaka jaka bret ñiut thymmai namar kan ktah ïaki hali pynthor jong ki nongshong shnong ba don sha trai kane ka jaka bret ñiut. Ka jingwanrah kane ka jaka bret ñiut kan ktah iaka koit ka khiah jong u paidbah ka thain, la ong ki nongshong shnong kiba kren ha kane ka jingialang.

Kila kyntu ïaka sorkar ban pynkynriah bad ban pynsangeh shi syndon ïaka jingwan bret ñiut ka JMB ha katei ka jaka namar ka long pyrshah ïaka jingsngew jong u paidbah ba bun ba lang.