Yn dang shim por ban pynkynriah ia ki nongshong die madan namar ka elekshon: Paul

Syllad | The Rising MeghalayaFebruary 6, 2025

U Myntri uba khmih ia ka Tnad kam jngohkai u Bah Paul Lyngdoh ha ka 5 tarik Rymphang u la ong ba ka jingpynkynriah ia ki nongshong die die madan kan dang kham shim por namar ka jingdon jong ka elekshon MDC ha Rilum Khasi bad Jaintia.

Haba kren sha ki lad pathai khubor, u Bah Paul u la ong, “Namar ka elekshon MDC, ka jingtreikam jong kiba bun ki ophisar sorkar ka long ha ki kam kiba iadei bad ka elekshon kumjuh wat ki Myntri sorkar kaba kynthup ia u Symbud Myntri Rangbah uba khmih ia ka Tnad Urban Affairs kaba dei khmih ia kane ka bynta, kumta kane ka kam kan dang kham shim por.”

“Hynrei kumba u la pynsngew bad kumba nga ruh nga la pynsngew sha phi ha ka sien kaba la dep, kane ka kam kan sa iaid shakhmat hynrei kan long satang katto katne por bad ngi la iaid shakhmat ruh ban ithuh ia ki jaka kiba thymmai na ka bynta ki nongdie madan ka ban sdang shwa nyngkong ha Khyndailad,” u la pyntip.

Halor ka jingbuh jingkylli da ka kynhun ki nongdie madan halor ka rai kaba la shim tang da ka Provisional Town Vending Committee, u Bah Paul u la ong, “Kumba nga la bteng ban pyntip sha phi, ka association ka dei kaba don bynta lang ha kane ka kam. Ngi la iakren bunsien bad ki mynta la palat shi snem tam. Ka long kaba eh ban pynhun lut ia baroh, hynrei na ka bynta jong ngi kaba nyngkong bad kaba hakhmat eh ka long na ka bynta ka bha ka miat jong ki nongshong shnong baroh kiba pyndonkam ia ka surok bad ki lynti iaid kjat, bad kumta ngi dei ban pynthikna ba ka bha ka miat ka dei ban long na ka bynta baroh lang.”

Haba kylli la kane ka jingpynkynriah kan urlong ha ka 7 tarik u Rymphang, u Myntri u la ong, “Ngi la dep ban pynshai bniah ia ka thong bad ia ka jingthmu jong ngi hynrei na ka bynta ki jingtip kiba bniah lah ban ioh na ka Tnad Urban Affairs kaba dei ka Tnad kaba biang ban ai jubab ia ki jingkylli ki jong phi.”