Yn dang shim rai ka MSSASA halor ka jingpynkhreh ka sorkar ia ka jingdawa pynkiew tulop

Syllad | The Rising MeghalayaSeptember 13, 2024

Ka Meghalaya SSA Schools Association (MSSASA) ka la ong ba shen kan sa shim ia ka rai halor ka rai jong ka sorkar Jylla ban buh ia ka jingtyrwa na ka bynta ka jingpynkiew tulop ia kumba 12,541 ngut ki nonghikai skul SSA ha ka Jylla.

Haba kren ha ka jingialang bad ki lad pathai khubor ha ka 13 tarik Nailur, u president ka MSSASA u Bah Aristotle C Rymbai u la ong, “Ngin sa shim ia ka rai ha ka jingialang jong ka general executive council (GEC) ka ban long ha ka 21 tarik Nailur halor ki sienjam ia kiba yn shim ha kaba iadei bad ka jubab ba la ioh pdiang na u Director of School Education & Literacy (DSEL) bad State Project Director, Samagra Shiksha Abhiyan (SSA) u Swapnil Tembe ha kaba iadei bad ka jingpynkiew tulop abd ka jingthung kam pura ia ki nonghikai SSA.”   

U la pyntip ruh ba ka kynhun jong ka MSSASA ka la iakynduh ia u Tembe ha ka 10 tarik Nailur.

“Ha kane ka jingialang u Tembe u la pyntip sha ka Seng ba u la ioh pdiang ia ka jingbthah na u Commissioner & Secretary ka Tnad Education na ka bynta ban buh shwa shipor ia kane ka jingtyrwa pynkiew tulop,” ong u Bah Rymbai.

Kaba ar, u la ong ba na ka liang u State Project Director u la pyntip sha ka Seng ba ka Tnad Education ka la tyrwa na ka bynta ban rah sha ka jingialang ka kynhun Myntri ha kaba iadei bad ka jingthungkam pura ia ki nonghikai SSA.

Nalor kata u Bah Rymbai u la ong ruh ba ka Seng ka la buddien bha ia kine ki artylli ki mat bad ka Sorkar hadien ba ka la pynlong ia ka jingiakhih shong kyllain mungor ba khlem buh por ha u bnai Naitung 2022.

Shuh shuh u la ong ba ka Seng ka la pynlong ia kiba buntylli ki jingialang bad ka Sorakr ha ka kyrdan jong u Symbud Myntri Rangbah abd u Myntri ka Tnad Pule Puthi ha kaba iadei bad kine ki artylli ki mat.