Yn ia tynjuh ki player ka Myngken HSS bad ki khynnah ki Club ba pawnam ka France ha Paris

Syllad | The Rising MeghalayaMarch 23, 2025

Ki khynnah skul jong ka Myngken Christian Higher Secondary School ki la hap ban pynkhreh ban mih noh na la ki iing ki sem ki jong ki ban leit ban ia aireng sha ka lympung ialehkai jong ka Indo-French Football Tournament, kaban sdang naduh ka 24 tarik Lber haduh 30 Lber ha nongbah Paris ha France.

Ha kane ka kynti ka kynhun ki khynnah ialehkai ka skul Myngken Christian HSS kaban ialam da u Bah Bobby L. Nongbet (AFC A Licence Coach) u District Sports Officer ka Ri-Bhoi District, la ioh jingtip ba ha kane ka lympung ialehkai kin hap ba kin iatynjuh bor iaki khynnah kiba la sain dur ha ki shlem ai jinghikai phutbol ba pawnam jong ki Club ialehkai phutbol jong ka ri France.

Ki Club kiba ki khynnah ka Myngken kin hap ban iakhun ki long ka FC Versailles, Bobigny FC, AAS Sarcelles Football bad Grigny FC.

Lah ban kdew ba kane ka kynhun kan ioh ruh ha ban shah hikai ne ban ia kilan met bad ki khynnah jong ka shlem ai jinghikai ka Olympique Lyonnais, kaba hangne ki khynnah skul jong ka Myngken Christian HSS kin ioh ia ka jingshah hikai bad pyntbit ha kata ka rukom kaba janai.

Ha kaba iadei bad kane ka bynta, haka 22 tarik Lber na ka liang ka ophis jong ka Directorate of Sports & Youth Affairs, ka la pynlong ia ka jingialang kitbok kitwiang ia kane ka kynhun ia kaba la pynlong ia ka ha Hotel Centre Point, ha kaba la wan ban iadon lang u President ka Meghalaya Football Association u bah Hamletson Dohling, u Director jong ka tnat u D.D Shira, u Principal jong ka skul bah Everlasting Pyngrope bad kumjuh u trai bad Chairman ka Shillong Lajong Football Club bah Larsing M. Sawyan.

Ha kane ka jingialang na ka liang ka Hotel Centre Point lyngba u Arup Kakati ba dei artad u Director of Culinary jong kane ka hotel, u la shim ia ka bynta ban hikai ia ki khynnah kumno ba kin nang ban bat proh bat shamoit, kumno ban shim ne khat ia ki bam bad kumta ter ter, namar kum ka ri, ka France ka dei ka ri kaba bat bha ia ki ain ki kanun jong ka rukom bam rukom dih.

Hadien kane ka jinghikai bad batai bnaih ia ki khynnah, ka la don pat ka jingialang kitbok, ha kaba ki nongkren ka kynthup naduh u ka jingkren maitphang na u bah Bobby. L Nongbet shaphang ka lynti iaid jong kane ka skul tad haduh ban da khreh leit sha nongbah Paris, u Director Sports, nangta u bah Hamletson Dohling bad kumjuh na bah Larsing M Sawyan.

Na ka liang ka MFA ka la wan shakhmat ba kan noh jingiarap T.1 lak kum ka dak ban ia tynrong lem ia ka jinglut jingsep na ka bynta kane ka kynhun.