Yn iaid beit ka jingiakhih da kaba thiah hapdeng surok NH6 ba kuman ka NHAI ban maramot: KSU

Syllad | The Rising MeghalayaSeptember 24, 2023

Ka Khasi Students’ Union (KSU) East Jaintia Hills District Unit lyngba une u kyrwoh ka pyntip sha ki nongshong shnong jong ka thain ba ka jingiakhih  jingiakhih paidbah da kaba thiah hapdeng ka surok bah NH-6, ha Khliehriat kan iaid shakhmat kumba la pynbna ha ka 25 tarik mynta u bnai.

Kane ka jingiakhih kan sdang naduh ka por 10 baje mynstep haduh 4 baje janmiet. Ka KSU ka la ong ruh ba kumba la sakhi lyngba ki lad pathai khubor ba kiwei kiwei ruh ki kynhun sengbhalang, ki synjuk bapher bapher kum ki nongniah kali Sumo, ki nongkamai ñiah Taxi bad kiwei kiwei ki kloi ban kyrshan ia katei ka jingiakhih namar ki la sngewthuh ba ka jingiakhih hi kam dei ka jingiohnong shimet jongno jongno, hynrei na ka bynta ka jingmyntoi jong uba bun ba lang.

Kumta ka KSU ka khot ka wer sngewbha ruh ia kiwei kiwei ki kynhun ban iasnohkti lang khnang ba ka jingdawa kan leit sha ki shkor ba kyllut jong ka NHAI bad kumjuh ka sorkar jylla.

Nalor kata ka KSU kala ong ruh ba sa kawei pat ka jingiakhih kata ha kajuh katei ka sngi kan naduh ka por 7 baje janmiet haduh ka por 5 baje mynstep ha kaba kan don ka jingsangeh iaid kali ha ki bynta u pud jong ka East Jaiñtia Hills District.

Kane kan iai bteng kumba shitaïew eiei kata tang ha kitei ki por ba la kdew. Halor kane ka seng ka la ong ba kam don ka jingpynbor iano iano ruh, hynrei ka dei tang ka jingkyntu bad kyrpad khamtam ia kiba napoh ka district kumjuh kiba na shabar district bad na shabar ka jylla ba kin sngewbha sangeh ka kamai.

Kane ka jingsangeh niaid kali ha kitei ki por ba la kdew kalong kum ka dak ban pynpaw pyrshah ia ka jingsngap mynthi jong ka ka NHAI kumjuh ka sorkar jylla.