Yn iaid shakhmat ka jingiakhih pyrshah ‘Stay at Home’ ha Jowai

Syllad | The Rising MeghalayaNovember 15, 2020

Ka jingiakhih pyrshah da kaba shong iing ‘Stay at Home’ jong ka synjuk ki waheh chnong Jowai kan iaid shakhmat lashai ka sngi Nyngkong ha Jowai.

Ka Synjuk Waheh Shnong Jowai kala rai ba kane ka jingiakhih pyrshah iaka pynkynriah iaka PWD North Jowai Division sha Shangpung Sub-Division, Shangpung. Ka sorkar Jylla kala pynkylla ruh iaka kyrteng ka Shangpung Sub Division sha ka Shangpung Division.

Kane ka ophis PWD North Jowai Division kala dep rah ruh iaki tiar ki tar naduh ka sngi Thohdieng ka taiew bala dep na Jowai sha Shangpung.

Hynrei ka synjuk waheh chnong Jowai kala rai ban iaid shakhmat ban pynlong ia kane ka jingiakhih naduh 5 baje mynstep haduh 5 baje janmiet lashai ka sngi ban pyrshah iaka rai ka sorkar.

Katkum ka jingpynbna ki waheh shnong ba lashai ka sngi baroh ki iew ki hat, ki dukan ki dukdoh kin khang ha Jowai bad kila don ruh ki nongpyniaid iew kiba la pynbna lypa ban khang iaka iew kum ka CNI Market kaba la buh da ka jingthoh ha khmat ka khyrdop jong ka iew.

Kumban shu pynkynmaw ba ka sorkar Jylla kala dep ban pynbna ruh ba haka jaka jong ka PWD North Jowai Division kan wanrah da ka mini secretariat, kaba u myntri rangbah ka Jylla u Conrad K Sangma ruh ula wan jurip iaka jaka kaba la thmu ban shna bad ula ong ba ka jaka kadei kaba biang nadong shadong.