Yn iakhih ki nongtrei JHADC namar ka jingbym ioh tulop lah phra bnai kynthih

Syllad | The Rising MeghalayaNovember 6, 2023

Wat hadien ka jingbym ioh tulop mynta lah phra bnai kynthih, hynrei ki nongtrei ka Jaintia Hills Autonomous District Council (JHADC) ki dang iai bteng ban leit sha la ka jong ka kam ka jam ka jong ki da ka jingkyrmen ba mynta ne lashai kin sa ioh pdiang ia ki tulop jong ki  khnang ba kin lah ban pynkhuid ia ki ram ki shah kiba ki la hap ban shim khnang ba kin lah ban im.

Hynrei, kane ka jingiai shah kaba jlan bad ka bym dei ruh ka sien kaba nyngkong kala kut haka Nyngkong. Baroh ki nongtrei kiba don palat 500 ngut ki la ia mih na la ki jong ki kamram treikam ha ryngkat ki lama iong ha baroh ki saw kynroh ka ophis ka JHADC ban pynpaw ia ka jingbitar ia ka sorkar bad ki bor ba dei khmih halor ka jingbym siew ia kane ka tulop ka jong ki.

Baroh ki nongtrei kiba la pynpaw ia ka jingiatylli lang kawei hapoh ka lama jong ka JHADC Staff Association ki la shim ia ka rai ban pynlong da ka jingiakhih ha ryngkat ka jingrah ia ki plakad dang shi bnai mynta namar ka jingbym siew ia ki tulop jong ki kaba naduh u bnai Kyllalyngkot mynta u snem.

Kane ka jingiakhih ka jong ki ka la seisoh khyndiat eh hadien ba ki bor ba dei khmih ki la pyllait ia ka tulop jong u bnai Kyllalyngkot mynta u snem.

Haba pynpaw halor kane ka jingbym ioh tulop kaba la neh bun bun bnai, kawei na ki nongtrei ka ainguh ia U Blei uba la pynioh ha ka bad ki dkhot ka longiing ia ki met kiba koit ba khiah ha baroh kine ki por, da kaba ong lem kumta ngan ym lah ban siew ia ka bai sumar hapoh hospital lada don ki dkhot ka longiing kiba ngat ha ka pang ka shitom bad kiba donkam ban ioh jingsumar hapoh ki hospital.

Shuh shuh haba pyntip halor ki jingpynkhreh ia ki jingiakhih nangne shakhmat, u president ka Association u Bah Johnson Pohrmen u la ong, “Ngin bteng ia kane ka jingiakhih ka jong ngi na ka bynta lai sngi kynthih naduh ka por 10 baje mynstep haduh 4:40 janmiet hadien ba la kut ka Dorbar Tlang, kata lada jia ba ngim pat ioh ia ki jingsiew ki jong ngi.”