Yn iakhun elekshon biang u ma Stephan Mukhim na Amlarem kyrshan u MLA barim & MDC Congress

Syllad | The Rising MeghalayaAugust 6, 2022

U Ma Stephan Mukhim MLA barim ka 7-Amlarem Constituency un iakhun biang iaka elekshon MLA sha ka ïingdorbar thawain ka Jylla.

Ia kane la ong da u president National People’s Party (NPP) 7- Amlarem Constituency ma Het Pohthmi uba long ruh u MDC na War West haba kren sha ki nongthoh khubor haka sngi Saitjain ha Amlarem.

La iadonlang ruh u MDC ka War East ma Gillroy Tariang nalor ki nongkyrshan u ma Lahkmen Rymbui, MLA ba mynta uba long u Myntri sorkar kiba la rai ban kyrshan noh ia u ma Stephan Mukhim.

U ma Het Pohthmi ula iathuh ba ki nongialam ka party ha Amlarem kila wan ban iakynduh bad iakren iaka kam ticket u ma Stephan Mukhim bad vice president NPP haka Jylla u Bah Prestone Tyngsong haka 27 tarik u Naitung (July). Ula ong ba na kaliang u Bah Prestone ula ong ba 100 naka 100 ka ticket NPP yn ioh u ma Stephan Mukhim bad ha u bnai Nailur yn pynbna paidbah.

Shuh shuh u ma Pohthmi ula ong ba u ma Stephan Mukhim ula ioh jingkyrshan ruh na u MLA barim ka War Jaintia u ma Riang Lenon Tariang, MDC Congress ma Holando Lamin nalor u nongkyrshan ba radbah u ma Lahkmen u ma Por Pakyntein, president barim BJP Amlarem u Everest Langstang bad kiwei kiwei.

U ma Pohthmi bad u ma Gillroy Tariang kila ong ba u paidkar ula ioh ban sakhi iaki jingtreikam u MLA ba mynta ma Lahkmen bad kiba bun kila rai ban kyrshan noh ia u ma Stephan. Kila kyntu iaki nongshong shnong ka thain Amalrem baroh kawei ba kim dei ban khuslai jingmut bad kim dei ban duh jingkyrmen namar ba u ma Stephan Mukhim un mihpli bad jop biang kum u MLA ka War Jaintia.

“U Ma Stephan Mukhim u dei u briew uba iohi jngai bad uba sngewthuh iaka eh ka shon u paidbah bad uba treishitom bad ngim kwah ban kynthoh ia ki kam ba u MLA ba mynta ula leh baroh ki paidbah kila sakhai,” la ong u ma Het bad khot wer ia baroh ki nongkyrshan bad ki nongialam ban trei shitom ban poi sha ka thong.

Kiwei kiwei ki MDC kiba kyrshan ia u ma Stephan Mukhim ki kynthup ia u MDC ka Jowai South Saron Paswet bad MDC ka Sohmynting Khliehtyrshi Lakhon Dkhar kiba don iaki nongthep vote kiba hap hapoh ka Amlarem Constituency.

U ma Por Pakyntein uwei na ki nongkyrshan ba radbah jong u ma Lahkmen ula rai ban kyrshan ia u ma Stephan Mukhim. “Nga la rai ban kyrshan ia u ma Stephan namar ba u MLA ba mynta u ma Lahkmen, ngim ju ioh ka lad ban pynsngew iaka jingeh jong ngi. Kiba bun kila ud kila nam ia u ma Lahkmen namar ba um khein snep ia u rit u ria bad ka jingangnud u paidbah haduh mynta wat lah jan kut sa ka samoi ruh kam shym la urlong.” la ong u ma Por Pakyntein.