Yn iakhun ka Volunteer For A Better Jaintia ban pynioh rashon ia baroh ki longïing ba duk

Syllad | The Rising MeghalayaMarch 12, 2023

Ka seng Volunteer for A Better Jaintia haka sngi Saitjain kala khot iaka jingialang ha Iungwalieh ka dorbar shnong Tpep-pale ban iakren sani halor ka jingbym ioh rashon ne card rashon kiba bun ki longiing ha rilum Jaintia.

La wan ban iashimbynta ha kane ka jingialang da ki longkmie longkpa kiba im sngi ban kamai jakpoh da kaba bylla ha kylleng ki shnong ka West Jaintia Hills District.

U Phrangsngi Sutnga, Convener Volunteer for better A Jaintia, ula ong ba ka thong bad jingthmu kalong ban pynioh rashon ia baroh ki longiing kiba wan na ki longiing ba duk.

Ka kong Dayoophi Iakai kala ong ba na ka liang ka tnad Food and Supply, West Jaintia Hills ka la dep ban phah lut iaki application jong kito kiba ialeh thymmai iaki Ration card sha ka Directorate of Food and Civil Supply, Shillong bad na ka bynta ban ioh iaka ration card kaba thymmai.

Ka Kong Dayoophi kala ong ba kiba bun ki longkmie kila pynpaw iaka jingsngewkhia iaka jingleh jong ka sorkar na bynta ban pynioh iaka hok jong ki ba haduh mynta mynne ka sorkar ka leh kuman ban pynbiang iaka jingdonkam jong ki.

U Ma Khroo Lamsalanki Pariat ula iathuh iaki har rukom bad ki jingmyntoi nongshong shnong na ki lai tylli ki Ration card katkum ka bhah kynthup iaka AAY Card, PHH Card bad ka Non NFSA card.

U Ma Pariat ula ong kum u briew uba sngewkhia iaka jingduh ki nongshong shnong iaka hok kaba ki dei ban ioh na Ration card. Ula ong ka por, ka dawa ia baroh ki khun ka ri Jaintia khamtam kito kiba don ha u lain jong ka jingduk jingkyrduh ba kin ieng tylli da kawei ka sur ban dawa iaka hok jong ki na ka sorkar da kaba iatreilang bad ki nongsam rashon bad ki waheh shnong.

Ha kane ka jingialang la rai ban thoh sha ka sorkar jylla kumjuh sha ka sorkar India ban pynkloi ban sdang noh iaka Census ne khanasamari khnang ban iaid beit iaid ryntih ka jingioh ration jong kito ki briew kiba dei hok. La rai ruh ban dawa na ka sorkar ban ai ration card sha baroh kito kiba la dep buh iaki kot ki sla ha ophis ka tnat Food and Supply naduh u snem 2020-21.