Yn ïakhun MP Lok Sabha u nongialehkai Kickboxing

Syllad | The Rising MeghalayaMarch 15, 2019

SHILLONG: U Nongialehkai Kickboxing barim ka jylla, u Bah Samuel Hashah hynne ka sngi u la pynbna ba un iakhun ia ka MP elekshon Lok Sabha na Shillong Parliamentary Seat kaban long ha ka 11 tarik Iaiong, kum u kyrtong shimet.

U Bah Hashah u dei trai shnong na Nonghyllam, West Khasi Hills District bad ha Shillong u shong u sah ha Umlyngka. U la mihkhmat ia ka jylla 12 snem kum u nongialehkai bad udei ruh u president ka All Meghalaya Kick-boxing Association (AMKA) bad u la hikai ia 200 ngut ki khynnah kynthei bad 300 ngut ki khynnah shynrang ha ka jingialehkai iakura.

Une u rangbah ula iakhun teng ia ka MDC elekshon na Mylliem ha u snem 2014 hynrei u khlem poi sha ka thong. U la iathuh ba kane ka jingmih jong u ha kane ka elekshon ka long namar ba ki paidbah ki pynpaw ba ki kwah ia ki jingkylla ym tang ha ka imlang sahlang, hynrei ban pynkylla ruh ia ki nongialam.

U Bah Hashah u la ong ba lada ki paidbah kin ailad ban phah ia u sha Lok Sabha, un rah ia ki mat kiba ktah ia ka jaitbynriew kum ka jingpynbeit ia u pud u sam bad ka jylla Assam bad kumjuh ruh bad ka ri Bangladesh, ka Citizenship Amendment Bill bad ban dawa ban pyntreikam ia ka Inner Line Permit ban khang lad ia ka jingwan rung beaiñ kiba nabar sha ka jylla nalor kiwei pat ki mat kiba donkam.