Yn iaknieh nam lahduh ka Chutwakhu bad ka Thadmuthlong haka Second Div ka WJDSA

Syllad | The Rising MeghalayaSeptember 28, 2023

Ka Mooknor Thadmuthlong ka jop da 2-1 pyrshah Shangpung Khliehmuchut haka jingialehkai semifinal kaba ar haka kyrdan Second Division Football Tournament- 6th Debo Shullai  Memorial Trophy kaba la pyniaid da ka West Jaintia District Sports Association (WJDSA) ha madan Kiang Nangbah Stadium haka sngi Palei.

Da kane ka namjop ka Mooknor Thadmuthlong kan aireng pyrshah iaka Chutwakhu haka jingiakhun final kaban long haka 2 tarik Risaw.

Haba phai sha ka jingialehkai, ka Shangpung Khliehmuchut kala tam shakhmat ha kane ka jingialehkai, ha kaba kala ioh pynkhih iaka jar tang haka minit kaba 6′ bala iaid ka jingiakhun. Ia kane ka kol la thep da u A Lamare.

Hadien ka jingshah tam da shikol ka Mooknor Thadmuthlong kala sdang ban iakhun tyngeh bad kala ioh ruh ka kabu ksiar ban pyniakhaid ha ka minit kaba 30′ lyngba u Iohi Dhar. Ka kol kaba ar ka Mooknor Thadmuthlong kala wan haka kylla miet lyngba u Rimiki Suchiang haka minit kaba 73′ kaba la biang pura iaka ban khur iaka nam jop.