Yn iaknieh nam lahduh ka Khliehmyntriang bad ka Rymbai Madanpynriang haka Third Div, sdang noh sa ka First Div ka EJHDFA

Syllad | The Rising MeghalayaSeptember 20, 2023

Ka Khliehmyntriang SC bad ka Rymbai Madanpynriang SC kidei ki ar tylli kynhun ki ban iaknieh iaka man lahduh haka jingialehkai Third Division Football Tournament kaba pynïaid da ka East Jaintia Hills District Football Association (EJHDFA) hadien ba Khliehmyntriang SC bad ka Rymbai Madanpynriang SC ki la khur jingjop haka jingiakhun semifinal kaba la long ha madan artificial turf Diengshynrum, Khliehriat haka sngi ba ar.

Haba phai shaka jingiakhun semifinal kaba nyngkong la rai hapdeng ka Khliehmyntriang pyrshah iaka Moosiang Lamare Old, iaka nam jop ka Khliehmyntriang la rai haka extra time. Haka jingialehkai haka por kaba la buh ka jingialehkai kala wai khlem don mano mano ba ioh pynkhih iaka jar.

U Bring Dkhar (92) bad Arun Dkhar (102) ki la thep ia ki ar kol ka Khliehmyntriang kaba la biang pura iaka kan khur nam jop.

Haka jingiakhun semifinal kaba ar kala mih ar tylli ki red card pynshah iaki nongialehkai ka Rymbai Madanpynriang SC hynrei ka jingskhem ki nongap ba shadien jong ka, kala jop da 2-1 Moosiang Lamare New.

Ka Moosiang Lamare New kala tam shakhmat lyngba ka kol kaba la thep u Firstjoy Pariat (5′). Ka Rymbai Madanpynriang SC kaba wan nadien kala pynphai kylla bad tam kylla da ka kol u Fighter Dkhar (16′) bad u Donaldo Dkhar (57′).

Ka Khliehmyntriang bad ka Rymbai Madanpynriang kin mih madan haka 23/09/2023 haka por 12.00 mynsngi ban iakhnieh iaka nam lahduh.

Ha kawei pat ka khubor ka EJHDFA kala pynbna ban sdang noh iaka First Division Fooball haka sngi Balang. Kane ka jingialehkai kan sdang da ka jingialehkai hapdeng ka Wahiajer Narpuh NYSSC pyrshah iaka Ladrymbai BSC haka por 12.00 baje mynsngi, ka Lumshken SC pyrshah iaka Tpepswer SSWO haka por 2.30 baje janmiet.

Ha kane ka lympung ialehkai la wan iashim bynta 16 tylli ki kynhun bad la phiah haki 4 tylli ki Pool ba kynthup ka Pool A, B, C bad D.

Ki kynhun kiba hap haka Pool A ki long ka Wahiajer Narpuh YSSC, Ladrymbai B SC, Mookhaialong SCSC bad Musniang SC.

Haka ka Pool B ki long ka Tpepswer SSWO, Lumshken SC, Shilliang Umshong SC bad Rangad SC.

Haka Pool C ki long ka Chiehruphi SYWSC, R. Pohskur SC, R. Synrang Shahkhain SC bad Pamrapaithlu SC.

Haka Pool D ki long ka Bataw YWSC, Lumputhoi SC, Khliehriat West FC bad Byndihati SC.