Yn iaknieh nam lahduh ka West Jaintia vs Nongstoin, Shillong vs Ri Bhoi ha ka Meghalaya Youth League

Syllad | The Rising MeghalayaOctober 9, 2024

Ka jingpynkhreh ban pyniakhun ia ka final jong ka lympung ialehkai phutbol Meghalaya Youth League (MYL) ba la khot pynlong da ka Meghalaya Football Association (MFA) ka la iaid shakhmat hadien ka jingiakhun semifinal kaba la long haka 9 tarik Risaw madan jong ka MFA ha Third Ground Polo bad kumjuh ha SAI STC, NEHU.

Ha ka thup jong ki U-14, ki district ki ban iaknieh ia ka nam lahduh ha kane ka lympung ki long ka West Jaintia District Sports Association (WJDSA) pyrshah ia ka Nongstoin District Sports Association (NDSA)

Katba ha ka U-16 ka jingiaknieh ban rah ia ka nam lahduh kan long hapdeng ka Shillong Sports Association (SSA) pyrshah ia ka Ri-Bhoi District Sports Association (RDSA)

Haba phai sha ki jingiakhun ia ki semifinal ha ka U-14 ka kynhun ialehkai jong ka West Jaintia District Sports Association ka la lah ban pynliem noh lyngba ka tie breaker ia ka Shillong Sports Association da 4-3, kata hadien ba ka jingiakhun ka la kut noh da kaba iakhaid khlem don ba lah ban thep kol.

Katba ha kawei pat ka jingiakhun, ki khynnah jong ka Nongstoin District Sports Association ki la lah ban pynliem noh da 1-0 ia ka Ri-Bhoi District Sports Association lyngba ka kol ba la thep da u a Refel Markwius Wanniang ha ka minit kaba 45.

Haba phai pat sha ka jingiakhun ia ka semifinal jong ka U-16 ka kynhun ialehkai jong ka Shillong Sports Association ka la lah ban pynliem noh da 4-1 ia ka WJDSA bad ka Ri Bhoi District SA ka la pynliem noh ia ka Nongstoin District SA da 3-2.

Mynta ka jingphaikhmat kan long sha ka jingiakhun final jong kane ka lympung ka ban long ha ka 11 tarik sngi Thohdieng, ha kaba ka final jong ka U-14 kan long ha ka por 11 baje mynstep bad ka U-16 ha ka por 2 baje nohphai sngi ha madan SSA Stadium First Ground, Polo, Shillong.

Kumta ruh na ka liang ka MFA ka khot ka wer sngewbha ia baroh ki paidbah ban wan sakhi bad ai mynsiem ia ki khynnah ialehkai ha kane ka jingiaknieh nam lahduh.