Yn iakren u Bah Paul bad Sorkar India ba kiew ki kam khaii drok naduh ba khie ka jingiaumsnam ha Manipur

Syllad | The Rising MeghalayaOctober 18, 2024

U Myntri ka Tnad Social Welfare u Bah Paul Lyngdoh ha ka 17 tarik Risaw u la ong ba shen un sa leit sha ka nongbah Delhi ban iakren bad ka Sorkar Pdeng hadien ba ka Jylla Meghalaya ka la sakhi ia ka jingkiew jong ki kam khaii drok naduh ba khie ka jingiaumsnam hapoh ka Jylla Manipur.

“Ngi la don ka jingkut jingmut kaba skhem ban rat dyngkhong ia u drok na kane ka Jylla Meghalaya. Kaba sngewsih ka long ba kane ka jaka jong ngi ka don marjan bad ka Golden Triangle, bad ka jingshisha ba ka jingiaumsnam ha Manipur ka la lam sha ka jingkynriah ia ki kam shalan drok na katei ka Jylla sha Meghalaya.Kane ka dei ka jingtynjuh.Ngan sa leit sha Delhi ban pynpaw sha ki nongialam ka sorkar pdeng halor ka jingsngewkhia kaba jur halor ka jingkiew jong ki kam khaii drok ha ka Jylla,” ong u Bah Paul haba kren sha ki ald pathai khubor.

Halor ka jingkem jong ki Sengbhalang ia ki nongdih drok, une u Myntri u la ong, “U President ka HYC u dei uba don jingtip ia ka ain. Phi dei ban kylli kaei kaba u tip halor ka NDPS ne PITNDPS. La ka Ain jong ka Ri ka shah ne em ia u ban shu leit kem ia ki briew?”.

“Ngi don hangne ​​ban pynneh ia ka ain bad kata ka dei ka jingthmu bad jingsngewkhia ba kongsan jong ngi kum ka sorkar bad ki nongthaw ain.Mynta haba phi leh ia kano kano ka kam kaba pyrshah ne kaba iaid pyrshah ia ka ain, ka jingtrei jong phi ka kylla long kaba beain.Phi lah ban mih paw ha ki headline lyngba ki lad pathai khubor, hynrei kane kam don jingmut satia ne lah ban wanrah ka jingkylla,” u la bynrap.

U Bah Paul ula ong ruh,”Lada phi pule ia ka NDPS, kino kino ki birew kiba ioh ban kurup drok kumta ruh un dei uba don ha ka kti jong ki bad ki kylla long u briew u ban hap ban batai balei ba u drok u don bad u, bad dei na kata ka daw ngi la pyrshang ban pyniar ia ka jingtreikam ka jong ngi.

“Phin sakhi ba ka dei ka sien kaba nyngkong ba ka Tnad Social Welfare ka la mih shakhmat ha kaba iadei bad kane ka phang. Mynshuwa ki dei tang ki pulit, hynrei mynta ngi la don sa ka DREAM Mission kaba la khlieh da u Myntri Rangbah ka Jylla.Kane ka pyni ia ka jingshim khia ka jong ngi halor kane ka bynta.Ngi kwah ban leh ia ki kam ha ka lynti kaba dei, kaba iadei da ka ain ym ban ngat ha ka bynta ka bym dei jong ka ain,” ong u Myntri.

Nalor kata u Myntri u pyntip ruh ba kiba bun ki Dorbar Shnong mynta ki la pynkhreh ban pynkha ia ki Village Defence Party (VDP) ha ka jingiakhun pyrshah ia u drok ha la ki jong ki shnong ki thaw.