Yn iakynduh u CM ia u Rajnath Singh ban ioh jaka ban pynkynriah ia ki Harijan na Them Metor

Syllad | The Rising MeghalayaDecember 6, 2024

U Myntri Rangbah ka Jylla, u Conrad K Sangma un sa leit iakynduh ia u Myntri iada Ri u Rajnath Singh ha New Delhi ban kyrpad ia ka jingtuklar lem halor ka jingtyrwa ka sorkar Jylla ban pynioh lem ia ka jaka na ka Cantonment na ka bynta ban pynkynriah ia ki 342 tylli ki longiing na Them Metor ha Them Iew Mawlong.

Haba pyntip ia kane ha ka 5 tarik Nohprah, u Symbud Myntri Rangbah ba khmih ia ka Tnad Urban Affairs u Bah Sniawbhalang Dhar u la ong, “Lehse lashai ne la shisngi u Myntri Rangbah u don ia ka jingthmu ban leit iakynduh ia u Myntri Iada Ri ka Sorkar Pdeng ha kaba iadei bad kane ka phang.”

Watla katta u la ong ba na ka liang ka sorkar kan dang ithuh ia ka jaka na ka bynta ka jingpynkynriah ia kine ki longiing na Them Metor. “Ki (bor shipai) ki kwah ban iakynduh ia ngi.Na kata ka daw u CM u la kwah ban iakynduh ia u Myntri iada Ri. Ngin sa ia peit ia kaei ka ban mih na kane ka jingialang,” bynrap u Bah Sniawbhalang.

Hashwa kane, ia ka jingkyrpad ban bhah ia ka jaka jong ki shipai la pynlong da ka kynhun jong ka Harijan Panchayat Committee (HPC) ha ka jingialang ba la pynlong da ka sorkar Jylla.

Haba kylli halor ka blueprint jong ka sorkar kaba tyrwa ban pynkynriah ia kine ki longiing sha ka jaka jong ka Shillong Municipal Board (SMB), u Symbud Myntri Rangbah u la ong, “Ka blueprint ka la don. Hynrei lada ka dang don ka lad kaba kham biang, ngi lah ban shim da kata. Lada ki shipai ki ai jaka ia ngi, ngin shu ioh ei khlem kano kano ka jinglut jingsep. Lada ki ai kan long kaba bha palat hynrei lada kim ai, kumno ngin leh ngin hap ban leit katkum ka blueprint.”

Nalor kata u Bah Sniawbhalang u pyntip ruh ba ka sorkar ka la kut jingmut skhem ban pynbeit noh kham kloi ia kane ka kam kaba la sahteng la kham slem.