Yn iamir jingmut ka Sorkar bad ki MLA, MDC bad Dorbar Shnong halor ka jingiakhun pyrshah drok

Syllad | The Rising MeghalayaJune 6, 2024

Ka Sorkar Jylla ka la khot pynlong ia ka jingialang iamir jingmut bad baroh ki MLA, MDC bad ki Dorbar Shnong ka Greater Shillong ha ka 7 tarik mynta u bnai hapoh State Convention Centre, Shillong khnang ban shim ia ka rai halor ki sienjam ia kiba yn shim ha ka jingiakhun pyrshah ia ka jingjyllei jong u drok hapoh ka Jylla.

Ia kane ka jingialang la khot pynlong da ka Tnat Social Welfare ha ryngkat ka jingiatreilang bad ka Tnat Kam pohiing (Police) bad u Deputy Commissioner ka East Khasi Hills District.

Kane ka sienjam ka dei shibynta jong ka Drug Reduction Elimination & Action Mission (DREAM) ba la sdang pyntreikam naduh u bnai Jylliew 2023, kata ka mission ban pyllait ia ka Jylla Meghalaya na u drok bad ka ban kynthup ia kiba bun ki sienjam lyngba ka jingiatreilang jong ka sorkar Jylla bad ki kynhun bapher bapher kaba thmu ban rat dyngkhong ia ka jingpyndonkam drok ha kane ka jylla.

Halor kane ka mat ba la kdew, na ka liang u Myntri ka Tnat Social Welfare u Bah Paul Lyngdoh u la buh ka jingkyrpad ia ki Dorbar Shnong jong ka Greater Shillong ba kin wan khnang khnang sha katei ka jingialang kaba kongsan ha katei ka sngi. U la ong ruh ba ka jingwan iashim bynta ka jong ki ka long kaba kongsan bha ha ka jingpyrshang jong ka sorkar Jylla ban iakhun pyrshah ia u drok bad ban pynlong ia ka jylla kaba shngain bad kaba lait na u drok.

Ha kane ka jingialang yn iakren ruh halor ka jingithuh ia ki jingduna ha kane ka jingtreikam kaba mynta ia kaba lah ban pynurlong lyngba ka jingiatreilang bad ki shnong ki thaw kum ki VDP.

Lah ban kdew ba katkum ka Meghalaya Village Defence Organisation Rules 2008, ki VDP ki dei kiba iadon bynta ha kaba iarap lem ia ki bor pulit na ka bynta ban pynneh ia ka shongsuk shongsain, ban pynlong ia ki jingiaid pahara bad ban khanglad ia ki kam bymman kum ki kam lute bad ki kam tuh kam thiem.U drok ruh u hap hapoh kane ka bynta jong ka jingtreikam ha kaba kin ioh ruh ia ki jinghikai kiba biang shibynta jong ka mission.Ia kane ka jingshim rai la shim hadien ka jingialang ba la lamkhmat da u Myntri ka Tnat Social Welfare ha ka 28 tarik u bnai Jymmang ba la dep shibynta jong ki sienjam jong ka Drug Reduction Elimination and Action Mission (DREAM).