Yn iashim bynta ki rang mareh thong na Kenya haka 3rd Sohra International Half Marathon 2024

Syllad | The Rising MeghalayaAugust 13, 2024

Arngut ki rang ia mareh thong ka ri Kenya ki la pyntikna ia ka jingwan iashim bynta ka jong ki sha ka iakob mareh thong ba bna nam ka jylla ba la tip kum ka “3rd Sohra International Half Marathon 2024.”

U kyrwoh lyngba u bah Finely L Pariat general secretary MSOA, u pyntip ba ki kyrteng jong kine ki arngut ki rang iamareh na Kenya ki long u Wycliffe Nyagotuga Juma bad Eliakim Kiplimo Cheruiyot, kiba la khur ruh ia ki nam jop ki jong na ka LINZ Marathon Austria bad ka Kenya Standard Chartered.

Nalor kata ka khubor ka iathuh ba ki jingpynkhreh ia kane ka ka jngiakob mareh thong kaba sah sa shi bnai ban pynlong ia ka mynta ka la iaid shakhmat.

Kumta la kyntu ia baroh kito kiba kwah ban wan ban iashim bynta ba kin ai noh ia ki kyrteng ki jong ki, namar ha kane ka kynti kaba mynta, ka jingpdiang ia ki kyrteng ki nongwan iashim bynta kan long tang 4000 hajar ngut.

Na ka bynta kito kiba kwah ban register ha ka jingiakob mareh ba “5K Run For Fun,” lah ruh ban register ha ka ophis treikam ka Meghalaya State Olympic Association ka (offline registration), ha JN Stadium, Polo.

Katba ia kito kiba dei na ki thain jong ka Sohra bad Seng Samla Shnong, ki nongiashim bynta ki lah ban leit ai ia  ki kyrteng jong ki ha ka dukan jong I kong Sol Shullai, kaba don Marjan bad ka Petrol Pump kaba don hajan jong ka thanat, katba ki khynnah skul ki lah ban register ha la ki jong ki skul ki jong ki kumba leh ha u snem ba la dep.