Yn iasoi MoU ka KHADC bad ka CRISP na ka bynta ka policy thungkam hapoh ka Council

Syllad | The Rising MeghalayaJanuary 10, 2025

Ka Khasi Hills Autonomous District Council (KHADC) ka la rai ba shen kan iasoi ia ka Memorandum of Understanding (MoU) bad ka Centre for Research in Schemes and Policies (CRISP) na ka bynta ban wanrah ia ka policy thungkam thungjam hapoh ka Council.

Haba kren sha ki lad pathai khubor ha ka 9 tarik Kyllalyngkot, u Chief Executive Member (CEM) ka KHADC, u Bah Pyniaid Sing Syiem u la ong ba kane ka rai iasoi MoU bad ka CRISP kaba dei ka tnad ba la ithuh da ka Sorkar Jylla ka la wan long ruh hadien ka jingai jigmut jong ka Comptroller and Auditor General of India (CAG) na ka bynta ka jingbud ryntih halor ka thungkam thungjam hapoh ka Council.

U la ong ba dang shen ka Executive Committee ka la wanrah ia ka kaiphod jong ka CAG kaba dei jong u snem 2017-2018 bad 2018-2019 hapoh ka Dorbar Tlang kaba dang shu kut ha kaba ka CAG ka la kdew shai ba ka la don ka jingthungkam thungjam hapoh ka Council kaba khlem da pyllait ia ki Advertisement ne pynlong ia ki eksam na ka bynta ka jingthungkam thungjam.

U CEM u la ong ba ki EC kiba la leit noh ruh ki la pyrshang ban wanrah ia ka policy thungkam thungjam hapoh ka Council hynrei haduh mynta ym pat shym la lah satia ban pynurlong ia kane ka jingthmu.

“Hynrei ka EC kaba mynta ka la iatreilang bad ka sorkar jylla bad shen ngin sa ia soi ia ka MoU bad ka CRISP na ka bynta ban iarap lem ia ka EC ba kan shna ia ki kyndon bapher bapher khamtam ha kaba iadei bad ka policy thungkam thungjam ha ka rukom kaba dei,” u la bynrap.

Ka CAG ka la bthah ruh ia ka KHADC ba ka dei ban weng kam noh ia ki 82 ngut ki nongtrei namar ka jingbym bud beit ryntih ia ka policy thungkam thungjam.

“Ka jingbym bud ryntih ia ka policy thungkam ka la plielad plie lynti sha ka jingthungkam kaba noh shiliang bad kaba shu jied briew. Khnang ban ym don ka jingleh shiliang ha ka thungkam thungjam, ka Council ka dei ban bud ryntih ia ki kyndon thungkam. Kine ki jingthungkam kiba long pyrshah ia ka Rule jong ka Council hi ki dei ban khein iap ne pynduh pyndam noh,” ong ka kaiphod.

Katkum ka The KHADC Service Rules, 1961 ka don ka jingtuh kyndon ha kaba iadei bad ka jingthungkam bad ka jingkyntiew kyrdan ia ki nongtrei jong ka KHADC.

Ka Rule 3 ka kdew shai kdar ba ka jingthungkam ha baroh ki kyrdan jong ki nongtrei ka dei ban long hadien ka jingpynbna laitkam bad ka jingpynlong ia ki eksam lane interview.