Yn iatreilang ka Sorkar Jylla bad ka UNICEF ban kyntiew ia ka “Childhood Development Programmes”
Ka sorkar jylla ka la iatehlok bad ka UNICEF na ka bynta ban iatreilang ban kyntiew shuh shuh ha kaba iadei bad ka “Early Childhood Development Programmes” ha kane ka jylla khnang ban pynthikna halor ka jingheh jingsan bad ka koit ka khiah jong ki khunlung khynnah.
Kane ka la wan long ruh hadien ba u Myntri Rangbah ka jylla u Conrad K Sangma haka 2 tarik Jymmang, u la khot ia ka jingialang bad ka kynhun ki nongmihkhmat na ka UNICEF hapoh ka jingialam jong ka Dr. Madhulika Jonathan kaba dei ka Chief of Field Office Assam bad North East States ban iamir jingmut ha kaba iadei bad kane ka bynta.
![](https://www.syllad.com/wp-content/uploads/2024/09/JIT-Vacancy-823x1024.avif)
Haba pynpaw ia ka jingangnud ban iatreilang bad ka sorkar Meghalaya, ka kynhun ka UNICEF ka la kut jingmut na ka bynta ban ai ia ka jingkyrshan bad jinghikai ha kaba iadei bad ka mat “Early Childhood Development Mission” ha kane ka jylla.
Ka kynhun ka UNICEF ka la pynpaw ba kan ai ia ka jingkyrshan kaba pura na ka bynta ka sorkar ban pyntreikam ia ki sienjam ban pynlong ka jingwad bniah ha kaba iadei bad ka jinglong jingman bad ka rukom im bad aijingsumar ia ki khunlung khnang ba yn lah ban shim ia ki sienjam ban kyntiew ia ka koit ka khiah bad ka jingheh jingsan jong ki khunlung khynnah ha kane ka jylla.
Da kaba ithuh kyrpadng ia ka bynta ba kongsan jong ki nongtrei ka Tnat Child Development Services (ICDS) ha kaba iadei bad kane ka bynta, ka kynhun ka UNICEF ka la pynpaw halor ka jingdonkam ban pynlong ia ki prokram aijinghikai ia ki nongtrei ka ICDS ha kaba iadei bad ka rukom sumar sukher ia ki khunlung naduh ba ki dang lung.
Na ka liang u Myntri Rangbah ka jylla u la pdiang sngewbha ia kine ki sienjam da kaba pdiang ruh halor ka jingkongsan ban kyntiew ia ka koit ka khiah jong ki khunlung khynnah na ka bynta ban pynwandur ia ka lawei jong ka jylla.
Leave a Reply