Yn iatreilang ka UDP-HSPDP ha ka ilekshon MP bad MDC ban wan, shen yn pynbna kyrtong

Syllad | The Rising MeghalayaDecember 13, 2023

Ka United Democratic Party (UDP) bad ka Hill State People’s Democratic Party (HSPDP) haka 12 tarik Nohprah, ki la shim ia ka rai ban iatreilang hapoh ka kynhun Regional Democratic Alliance (RDA) ha kane ka ilekshon MP Lok Sabha bad ilekshon MDC ka ban wan.

Haba kren sha ki lad pathai khubor, u Chairman ka RDA uba dei ruh u nongialam ka UDP u Bah Metbah Lyngdoh u la ong; “Mynta ka sngi ngi la sdang ban pynlong ia ka jingiamir jingmut ha kaba iadei bad ka jingpynkhreh ia ka ilekshon MP bad MDC. Ngi la shim ia ka rai ba ngin iakhun ryngkat lang ha baroh kine ki artylli ki ilekshon.”

Watla katta u Bah Metbah u la ong ba ka RDA shen kan sa shong jingialang biang ban shim ia ka rai halor u kyrtong iamon lang na ka bynta ka Shillong parliamentary constituency.

Da kaba pynpaw ba ka por ban pynbna ia u kyrtong kam pat lah ban urlong, une u chairman ka RDA u la ong; “Ngi dang iai bteng ban pynlong ia ka jingiamir jingmut lang nalor kiwei pat ki sienjam kiba ngi la iakren ia kaba ngin dang iakren biang ha ka jingialang ka ban wan.”

“Ia mynta hi ngim pat iakren ne pynmih ia ka kyrteng jong kino kino kiba kwah ban iakhun ha kane ka ilekshon ka ban wan, hynrei shen ngin sa pynbna  ha ka por kaba biang, kata hadien katei ka jingialang ka ban wan,” u la ong shuh shuh.

Ha kawei pat ka bynta, u Bah Metbah u pyntip ba hynriew ngut ki dkhot na ka seng HSPDP bad san ngut na ka Seng UDP ki la pyniasoh kum ki dkhot jong ka RDA, bad mynta ka jingkhlainbor jong kane ka kynhun synrop ka la kynjoh sha ka 15 ngut.