Yn ioh bhah ka san shnong naka NDB ba phaikhmat sha ka Tourism

Syllad | The Rising MeghalayaNovember 8, 2020

Ka kam khaii dewiong kadei ka lad ioh kam iohjam bad kamai kajih jong kiba bun ki shnong ha East Jaintia Hills District, hynrei ki san tylli ki shnong ka jingkhang tih dewiong haka jylla kam shym la khang lad iaki pynban kila pyrkhat da kumwei ban kamai kajih ban im jakpoh da kaba iada jingbuh jingsat ka mariang.

Kine ki san shnong ki kynthup iaka Mukhla Ialong, Cham Cham, Lumchyrmit, Mutong bad Pynthorsale kiba la thaw iaka synjuk naduh u snem 2006 na ka bynta  ban peit iaka bha ka miat ka shnong kaba la tip kum ka 5 Shnong Welfare Association.

Kane ka Association kadei kaba peit iaka roi ka par kitei ki san tylli ki shnong bad ka pyniaid ruh ia kawei ka skul kaba don Mukhaialong, kaba la tip kum ka San Shnong Secondary School.

“Ha ki snem kiba mynshuwa bad haduh mynta kane ka synjuk ka pynlang ia u dewiong shi belsha ar besha na manla ki trok bad shaktiman kiba kit dewiong na katei thain ban buria iaka jinglut jingsep ban pyniaid iaka skul bad kiwei kiwei ki kam pynroi haka imlang ka sahlang,” la ong u ma Tyrnit Pdein, Secretary San Shnong Welfare Association.

Une u rangbah uba ialade ruh ula phai shaka kam rep kam riang bad kam ri jingri ula ong hadien ka jingkhang tih dewiong ki nongshong shnong  ha kine san tylli shnong kiba im ja da kaba bylla tih dewiong ki la kyrduh, kala pynlong iaki nongialam bad nongshong shnong ban wan ha ka juh ka rukom pyrkhat ban phai khmat sha ka Tourism ban im jakpoh.

U ma Tyrnit ula ong “Ha kine ki kyndiat snem bala sdang ban pynbha bad ai jingiada iaki law kyntang ha Mukha Ialong bad ai jingiada iaka Sahksaw ka thwei kaba don haka bynta jong ka wah Myntdu, Rynji nalor kiwei kiwei ki jaka jngoh kai kum ka Mooshutia, Khloo Pohblai Mooshutia kala khring iaki ba bun ki nongwan jngohkai trai shnong bad kiba nabar.”

“Kane kala ai mynsiem ia ngi bad ngi la pyrshang hala ki bor barit ban ai jingiada bad pynbha shuh shuh iaki jaka ba itynnad ha kine san tylli ki shnong,” la ong shuh shuh u ma Tyrnit bad bynrap ba kane ka thain ka don iaki kshaid, ki wah kiba long ban shonglieng nalor ba ki khlaw ki don har rukom ki jingthung jingtep bad mrad mreng.

Haka sngi Saitjain u Myntri rangbah ka sorkar Jylla u Conrad K Sangma, u Myntri ka tnad pule puthi u Lahkmen Rymbui bad u Myntri ka tnad Disaster u Kyrmen Shylla uba long ruh u MLA ka thain kila hiar shaka Sahksaw ban leit jngoh iaka Sahksaw, ka jaka kaba khring iaki ba bun.

“Ka sorkar ka don ïa ka jingangnud ban pynbha ïa ki jaka jngohkai ha ki thain nongkyndong bad kane thain ruh kadei kawei ia ki jaka kaba lah ban kyntiew kum ki jaka jngohkai,” la ong u Conrad K Sangma.

Ula ong ruh ba ka New Development Bank ka la mang haduh 700 klur tyngka ban kyntiew ïa ka kam jngohkai ha kane ka jylla bad ka San Shnong kadei kawei ka ban ioh bhah ia kane ka skhim ban kyntiew ïaka kam jngohkai pyrthei. 

Shuh shuh ka San Shnong Welfare Association kala ai da ka dorkhat ha u Myntri Rangbah ban iarap pisa ban shna iaka surok na Lumshyrmit sha Skentalang village kaba don ka jingjngai 17.5 KM nalor ban pynbha iaka Moopun, Sahksaw, Rynji And Latang Falls Sahksaw Fish Sanctuary, View Point Mooshutia, Fish Sanctuary, Khloo Pohblai Mooshutia Community Reserve, Khymphum Smrlien, Sniriang Park And View Point, Spain Fish Sanctuary, Lakoh Falls Rymbai, Umiangi Khliehtishe.