Yn ioh synthetic track ka Kiang Nangbah Stadium, katto katne ki jingialehkai na ka National Games

Syllad | The Rising MeghalayaJanuary 20, 2021

Kawei hadien kawei ka sorkar kala kular bad mang ban pynbha iaka Kiang Nangbah Stadium bad mynta ka kynti ruh ka sorkar MDA hapoh ka jingialam u Conrad K Sangma kala kular ban tei pynbha iaka Kiang Nangbah Stadium kumjuh ka Indoor Stadium.

Kaba sngewtynnad shuh shuh kalong ba iaka Kiang Nangbah Indoor Stadium yn pynkylla ïaka State of Art Stadium bad yn buh flood lights ruh iaka madan.

Nalor ban shna noh iaka stadium kaba heh “mega football stadium” ha Wahiajer, West Jaintia Hills haka jinglut kaba T.25 klur.

U Myntri Rangbah haka tweet jong u dangshen, ula pynbna ba na ka bynta ban pynbha iaki jingtei haki thain nongkyndong hapoh ka Rural Sports Infra la mang ban pynlut T.50 klur hapoh ka jylla ha kine ki lai snem ban wan kaba hap haka Restart Meghalaya Mission.

Ka All Jaintia Sports and Games Forum (AJS&GF) haka sngi ba ar kala iakynduh ia u Myntri Rangbah Conrad K Sangma, uba la kular ia kane ka synjuk ban shna pynbna ia ki madan ialehkai bad ban wanrah katto katne jait ki jingialehkai ha Jaintia Hills lyngba ka National Games 2022.

Ha kane ka jingiakynduh ia u Myntri Rangbah la ialam da u ma Eddie Murphy H Passah, u Ambrose Gatphoh kiba long ki chairman bad secretary ka forum bad ki nongaiktien kiba kynthup ia President JSU bad General Secretary u Jersom Shylla bad u Treiborlang R Suchen.

Kane ka synjuk kala ai ruh da ka dorkhat sha CM halor ka jingshah kyntait ka Jaintia Hills haka National Games bad dawa ban tei bad shna pynbha iaki jaka ialehkai ha rilum Jaintia kaba la pynmih bun ki nongialehkai ha ki jait ialehkai bapher bapher.