Yn jurip bniah ka sorkar jylla ban ithuh ia ki jaka na ka bynta nongdie madan ha ka nongbah Shillong

Syllad | The Rising MeghalayaNovember 15, 2023

Ka sorkar jylla kan pynlong da ka jingleit sorbe kaba shi bnai kynthih ban ithuh ia ki jaka na ka bynta ki nongshong die madan ha ka nongbah Shillong.

Ha ka jingpynbna ba la pynmih katkum ka No. UAU.71/2023/37 dated Shillong the 1st November, 2023, kane ka jingleh ia ka sorbe kan long shibynta ban pyniaid shakhmat ia ka kyndon Section 4 of “The Meghalaya Street Vendors (Protection of Livelihood and Regulation of Street Vending) Scheme, 2023”.

Ki jaka ia kiba yn pynlong ia kane ka jingleh sorbe ki kynthup ha ki bynta jong ka Khyndailad, Laitumkhrah bad ha ka thain Polo.

Kane ka jingleh sorbe kan sdang naduh kane ka sngi Saitjain ka ban wan bad pynkut ha ka 18 tarik u bnai Nohprah 2023. Ia kane ka jingleit sorbe yn pyndep ha ki laitylli ki por ba la bynta, kata ha ka por 7 baje haduh 10 baje mynstep, 11 mynstep haduh ka por 5 baje janmiet bad 5 baje janmiet haduh 7 baje janmiet ter ter.

Ka jingpynbiang pynbit ha kaba iadei bad kane ka jingtreikan kan long hapoh ka ophis jong ka Shillong Municipal Board, Bishop Cotton Road, Shillong-793001.