Yn khang iaka Iaw Thymme ha Jowai lashai ka sngi

Syllad | The Rising MeghalayaJanuary 7, 2022

Ka Jaintia Hills Autonomous District Council (JHADC) kala rai ban khang iaka iew Iaw Thymme kaba don ha Ladthadlaboh Jowai lashai ka sngi (8 tarik Kyllalyngkot) ban ioh pynkhuid iaki ñiut kiba la sahkut naduh u bnai Nohprah 2021.

Ia kane ka rai ban khang iaka iew la shim hadien ka jingiakynduh ka synjuk waheh shnong Jowai hapoh ka jingialam u president ka synjuk ma Alan Niangti ia u Executive Member jong ka JHADC ba dei peit iaki iew ki hat u Ma Evening Teron haka sngi Thohdieng.

U Ma Evening Teron, ula iathuh ba nakaliang ka synjuk ka waheh shnong kala wan iakynduh ia u ban kyntu ban khang iaka iew ban pynkhuid iaki ñiut kiba la sahkut ha katei ka iew.

U Ma Teron ula ong ba kane ka jingpynkhuid iew kan long tang na ka bynta shisngi namar ba lashai ka sngi kin kit ia baroh ki ñiut kiba mih na katei ka iew ban bret sha ka jaka bret ñiut thymmai kaba don ha Mooshutsdai Mookabeng hajan ka shnong Sohphoh.

Shuh shuh kumban shu pynkynmaw ba ka synjuk waheh shnong Jowai kala rai ban khang iaki iew ha Jowai lada ka konsil bad ka Jowai Municipal Board (JMB) kim lah ban pynkhuid iaki ñiut. Ka bor synshar district ryngkat ka JMB kila pan por ban pynkynriah iaki ñiut kiba mih na Jowai kaba la pynlong iaka synjuk waheh shnong ban pynjynsur iaka rai kaba kila shim.

Hynnin ka sngi ki ñiut ka JMB kala pynkhuid iaki ñiut kiba lum thup ha khmat ka DC ophis, Iawmusiang bad ha lad Thomas Jones Synod College bad kaba dang sah ka long ha ki iew shimet ba kynthup iaka iew Seinraij, Presbyterian bad iew CNI.