Yn khlieh u Justice Garg ia ka Expert Committee ban bishar thymmai ia polisi thung kam ha ka jylla

Syllad | The Rising MeghalayaAugust 25, 2023

U Judge ka iingbishar Madhya Pradesh High Court u Justice (Retired) Mool Chand Garg u la shah thung  kum u chairman ka Expert Committee ha ka sorkar MDA II na ka bynta ban bishar thymmai ha kaba iadei bad ka policy bhah thungkam thungjam ha ka jylla ne ka State Reservation Policy.

Na ka liang ka kynhun Myntri ba la ialam da u Myntri Rangbah ka jylla u Conrad K Sangma ka la ai  ruh ka jingmynjur ha kaba iadei bad ki san ngut kiwei pat ki dkhot jong ka Expert Committee ha ka jingialang kaba la long mynta ka sngi Thohdieng.

Nalor kata ka sorkar kala thung ruh ia u Judge barim ka Allahabad High Court Justice (Retd) Dr Satish Chandra kum u Expert Member ha ka Constitutional Law. U Justice Chandra u dei ruh u President barim ka Custom, Excise bad Service Tax Appellate Tribunal.

Katba ki lai ngut kiwei pat ki dkhot jong ka expert committee ki kynthup ia u  Prof DV Kumar na ka Department of Sociology, NEHU, Shillong kum u expert member ha ka Sociology, Prof Chander Shekhar na ka Department of Fertility and Social Demography, Indian Institute of Population Sciences (deemed to be University), Mumbai kum u expert member ha ka population studies bad u Prof Subhadip Mukherjee, Assistant Professor of Economics and Public Policy ka IIM, Shillong kum u expert member ha ka Economics.

Shuh shuh na ka liang ka Myntri kaba dei ruh ka nongaiktien Sorkar, ka  Kong Ampareen Lyngdoh ka la pyntip ba ka kyndon treikam jong ka Expert Committee kan long ban bishar thymmai ha kaba iadei bad ka Reservation Policy ba mynta ka jylla bad ban ai jingmut halor ki jingpynkylla, kata lada donkam ban shim ruh ia ki jingiasyllok bad baroh ki kynhun bapher bapher nalor ban leit iuhkjat ha kylleng ki jaka ka Jylla ban pan ia ki jingmut na ki paidbah.

Nalor kata na ka liang ka Myntri ka la ong ruh ba la aipor ia kane ka Expert Committee ba kan aiti ia ka kaiphod sha ka Sorkar Jylla hapoh ka 12 bnai.