Yn khot jingialang paidbah halor ka lynti rel ha East Jaintia Hills

Syllad | The Rising MeghalayaDecember 9, 2023

U Myntri Sorkar Jylla uba dei u nongmihkhmat ka UDP na Khliehriat, u Bah Kyrmen Shylla haka 8 tarik Nohprah, ula pyntip ba kan don ka jingialang paidbah kaba heh ha u bnai Kyllalyngkot u ban wan ban pan jingmut na ki paidbah ka district halor ka sienjam ba la shim da ka sorkar ha kaba iadei bad ka jingthmu ban wanrah lynti rel hapoh ka district.

Haba kren sha ki lad pathai khubor, u Bah Kyrmen u la ong ba ia kane ka rai u la shim ha ryngkat ka nongmihkhmat ka NPP na Sutnga-Saipung ka Kong Santa Mary Shylla da kaba bishar halor ki jingpynpaw u paidbah ia la ki jong jong ki jingsngew ha kaba iadei bad kane ka phang.

“Man ba ngi iakynduh ia ki kynhun bapher bapher, ngi shem ba ym baroh kiba kyrshan ia ka jingai jingmut ban wanrah lynti rel hapoh ka district, bad ruh ym baroh pat kiba long pyrshah ia ka. Kumta, ka ban kham biang eh ka long ban khot ia ka jingialang paidbah kaba heh khnang ba ki paidbah ka district kin lah ban pynpaw ia la ki jong ki jingsngew bad ban aijingmut halor kane ka bynta. Ngin sa dang pynbeit ia ka tarik, hynrei kane ka jingialang kan long beit ha une u bnai Kyllalyngkot 2023,” u la ong.

Da kaba pynpaw ba ka jingshim rai halor kane ka bynta kam dei ban long kaba leh kyrkieh, une u Myntri u la ong; “Ngin khmih ha ka por kaba biang khnang ba ngin lah ban pynlong da ka jingiamir jingmut kaba laitluid halor kane ka bynta.”

“Lada kiba bun ki ieng pyrshah ia ka lynti rel, ngi don ryngkat bad ki paidbah, bad lada kiba bun ki mynjur ban wanrah ia ka lynti rel, ngi don ryngkat bad ki paidbah namar ngi dei ki nongmihkhmat,” u la ong shuh shuh.

Haba kylla, une Myntri u la ong; “Ki don katto katne ki briew kiba pyrshah ia ka jingwan jong ka rel khlem kino kino ki daw kiba shong nongrim, bad ki don katto katne kiba kwah ia ka jingwan ka rel, hynrei haba kylli ia ki balei ki kyrshan, kine ruh kim don jingtip balei ba ki ai jingkyrshan.”

Dei na kane ka daw u la ong ba ka jingthmu jong kane ka jingialang ka long ban iamir jingmut halor ki jingioh jingmyntoi bad ki jingduh jingmyntoi na ka jingwan jong ka rel khnang ba ki paidbah kin ym kyrshan ne ban pyrshah matlah halor  kane ka bynta.

“Lada ngin kyrshan matlah, lada kan ktah iangi hadien, ngi lah ban babe, kumjuh lada ngi pyrshah hynrei lada kalong kaba bha ngin babe. Ngam kwah ba ki briew jong nga kin shim ia ka rai ka ban ktah ia ki hadien habud lane ba kin babe hadien. Kumta baroh ki kynhun ki ba dei ban ia don bynta ki dei ban wan ryngkat lang bad ban shim ia ka rai la kin kyrshan ne kyntait ia kane,” ong u Bah Shylla.

Haba kylli halor ki katto katne ki nongialam, kata khamtam na ka NPP, kiba la kyrshan ia kane ka mat, u Bah Kyrmen u la ong ba ka jingthmu jong katei ka jingialang kam dei satia na ka bynta ban ioh nong ha ki kam sain hima, kata la ka long na ka bynta ka UDP lane ka NPP.