Yn khot jingialang u DC iaki shipai BSF ba kyntur pud ki Bangladesh, phah tohkit iaka skim bylla 100 sngi ha Muktapur

Syllad | The Rising MeghalayaFebruary 11, 2022

U Deputy Commissioner, West Jaintia Hills District Garod LSN Dykes ula ong ba un khot da ka jingialang ki shipai BSF bad ka ophis u BDO Amlarem halor ka jingkynnoh kyntur pud ki nong Bangladesh ha Muktapur bad pynthud iaka jingiaid beit ki kam pynroi na ka skim 100 sngi ne ka MGNREGA.

Ia kane u DC ula ong haka jingujor ka KSU War Jaintia Circle haka sngi Palei halor ka jingkynnoh ia sylla lang ki shipai BGB bad ki nongshong shnong ka Bangladesh ha khappud ban kyntur pud shaduh shapoh shnong Muktapur bad ker iaki jaka rep jaka riang, kaba ka KSU kala leit ban pynpra bad thang haka 4 tarik une u bnai.

Katkum ka dorkhot ka KSU kala pynpaw ba ka shnong Muktapur kala shah khanglad ha ki shipai BGB (Bangladesh) ban pyntrei ia ka side drain ne nala jong ka madan football kaba hap hapoh u pud u sam jong ka India bad na ka liang ki BSF ki shu peit kai khlem tuklar halor kane ha kaba ka ka jaka ka dang hap hapoh u pud u sam jong ka India.

La iathuh ruh ba ka jingwan kyntur pud ki nong Bangladesh ka long da kaba thung da ki kba ki jhur ha ki jaka ba dei trai da ki nongshong shnong ka Muktapur.

Katba ki shipai Border Security Force (BSF) kila khang ban pyntrei ia ka jingtrei jong ka scheme MGNREGA ne ka skim bylla 100 sngi ha ka por sngi bad phah trei ha ka por miet ha katei ka shnong.

U General Secretary KSU War Jaintia Circle  Lurman B Talang, ula ong ba kila ai da ka dorkhat ha u DC bad na kaliang u DC ula shimkhia ia kane bad un phah tohkit iaki BDO bad ban khot iaka jingialang bad ki BSF ban pynneh iaka shongsuk shongsain ha khappud.