Yn khring ka ‘Cherry Blossom Festival’ ia kumba 1 lak ngut ki nongwan shangkai pyrthei

Syllad | The Rising MeghalayaOctober 13, 2023

Haduh kumba 1 lak ngut ki nongwan shangkai pyrthei la khmih lynti kin wan ban iashim bynta ha ka tamasa ‘Shillong Cherry Blossom Festival 2023’ ba lai sngi kynthih ka ban sdang naduh ka 17 haduh ka 19 tarik u Naiwieng u ban wan ia kaba yn pynlong hapoh RBDSA Sports Complex, Ri Bhoi District.

Haba pyntip ia kane haka sngi Thohdieng, u Myntri ka Tnat Tourism u Bah Paul Lyngdoh u la ong ba ki khmih lynti ia shibun ki jingioh nong lyngba ka kam jngohkai pyrthei ha ka jylla lyngba kane ka tamasa.”

“Kin don haduh  kumba 30,000 ngut ki paidbah ki ban wan sakhi ha ka shi sngi, kata kaba mut ha kaba kut jong ka tamasa kin kynjoh haduh kumba 1 lak ngut ki nongwan sakhi.Haduh 90% na kine ki nongwan sakhi la khmih lynti ba kin dei ki nongwan shangkai ne tourist kiba napoh bad kumjuh na shabar jong ka ri,” la ong u Bah Paul.

Nalor kata u la pyntip ruh ba ka sorkar Meghalaya mang T.1.99 klur na baroh ka jinglut  kaban kot baroh sha ka  T. 9 klur na ka bynta ban pynlong ia kane ka tamasa ba pawkhmat ha ka jylla.

Da kaba pynpaw ba lyngba kane ka tamasa kan pynioh jingmyntoi shibun ia ki nongrwai bad ki nongtem nongput kiba dei ki trai jylla, u Bah Paul u la ong; “Ki nongtem nongput ka jylla kin iohlad ban iashim bynta lang ha ryngkat ki kynhun ba pawkhmat ka pyrthei.”

Ki nongwan iashim bynta kiba kham pawkhmat ha kane ka tamasa ki kynthup ia ki nongrwai bad kynhun ba pawkhmat, kata kum u Ne-Yo, Ronan Keating, Sanam, Jonas Blue, SURL, Pink Panda, Kenny Musik nalor ki kynhun donsap trai jylla, kaba kynthup ia ka Meba Ofilia, Lou Majaw,  Blue Temptation nalor kiba bun kiwei pat ki nongrwai bad nongtem ba pawkhmat na ka thain shatei lammihngi (Northeast) jong ka ri.

Nalor kata kane ka tamasa kan ym kut tang ha ki jingrwai bad jingtem jingput, hynrei ki don shibun bah kiwei pat ki jingpynbyrngia, kata kum ka jingiakop Miss bad Mr. Cherry Blossom Pageant, choir contest, graffiti contest art installation contest nalor kiwei kiwei pat.