Yn kiew rynsan 11 ngut haka ïakop thei bha briew ‘Miss Lukha’

Syllad | The Rising MeghalayaJanuary 9, 2020

KHLIEHRIAT: Haduh 11 ngut ki thei bhabriew kin kiew rynsan ban ïaknieh ïaka nam ‘Miss Lukha’ haka tamasa ‘Lukha Festival 2020’ ka ban long haka 1 tarik Rymphang (February) 2020 ha Sunapyrdi, East Jaiñtia Hills District.

Ïa kane ka tamasa la pynlong da ka Sonapyrdi Tourism and Economic Development Society (STEDS). Kane ka tamasa kan sdang haka 31 tarik u Kyllalyngkot da ka jingïakop jngi, kinglieng, shad, ka put ka tem bad kiwei. Haka 1 tarik Rymphang pat nalor ka Miss Lukha kan don ka jingïakop shongdur, ka jingiaid kjat ha Narpuh Wildlife Sanctuary bad kiwei kiwei.

Ka STEDS kala pynlong ïa kane ka tamasa naduh mynshem snem haka kyrteng jong ka  Wah Lukha, kaba wah kaba heh bad kaba paw nam ha Rilum Jaiñtia.

U President STEDS u Daiaperbha Lamare kane ka tamasa kan long harud ka wah Lukha bad ka jingthmu kalong ban kyntiew ïaka kam jngohkai kaba dei kawei na ki lad ban plie lad plie lynti ban ïohkam ki samla.

‘Ka jingthmu kane ka tamasa kalong ban pynsaphriang ruh ïaka khubor halor kumno ban tyngkai jingbuh jingsat ka mariang,” la ong u Daiapherbha.

Ïa kane ka tamasa la kyrshan da ka AVON Company, Ri Kanaan Resort.

Ha kane ka jingïakop thei bhabriew la wan ban ïashimbynta da ki thei bha briew na Khasi-Jaiñtia bad kawei thei na Arunachal Pradesh. Ïa kane ka jingiakop bhabriew yn pyniaid da ka Sookini Sutnga ka nongjop jong ka Miss Cherry Blossom India International Festival 2017, Miss Tourism Queen worldwide East India 2018 bad kiwei kiwei.

Kine ki 11 ngut ki thei bhabriew ki kynthup ïaka Bibanylla Nongsiej, Chelistina Dkhar, Kerlarity Kharkongor, La I bynta Nongsiej, Mayalang Ymbon, Riya Suting, Sandakini Rymbai, Stefanie Dkhar, Basum Ango bad ka Rimpy Das.