Yn leit iashim bynta ka kong Dolly Khonglah haka workshop ban pynkhlain iaka khaii ka pateng bad jingpyniasoh ha Bhutan

Syllad | The Rising MeghalayaOctober 19, 2024

Ka Secretary ka Meghalaya International Exports Chamber of Commerce ka Kong Dolly Khonglah kan leit iashim bynta ha ka Sub-Regional Capacity Building Workshop ban pynkhlain iaka khaii pateng bad ka jingpyniasoh kaba bun rukom sha ka thain shaphang shathie lammihngi ka dewbah Asia. Ka matpdeng kane ka workshop kalong ‘Promoting Multi-modal Connectivity in Eastern South Asia’ ka ban long ha ka 22 bad 23 Risaw 2024 ha Paro, Bhutan.

Ia kane ka workshop la khot pynlong da ka Economic & Social Commission na ka bynta ka Asia bad ka Pacific South bad South-West Asia, bad ha kane ka workshop yn iakren halor ki jingtyrwa ban wanrah ki jingkylla ha kaba iadei bad ka leit ka wan bad ban pynsuk ia ki kam khaii pateng na ka bynta ka jingkiew jong ka roi ka par hapdeng ki nongkhaii bad ki nongshong shnong kiba dei ki trai shnong.

Ha kane ka jingialang yn wan iashim bynta ruh da ki heh ka tnad kam khaii pateng, tnad custom bad ki kynhun ba khmih ia ki kam khappud, ki riew shimet na ki ri ka ESA, ka BIMSTEC, kiwei ki kynhun ba don jingiadei jong ki thain, ki tnad khmih kam pynroi, ki riew shemphang bad ki seng jong ki nongkhaii.

Ka ESCAP ka ai ka jingkyrshan ia ki ri ka ESA ha kaba pynbha bad kyntiew ia ki lad jingpyniasoh ba bun rukom ha ki kam khaii pateng ha ki thain lyngba ki sienjam bad ki prokram pynroi bad jingiarap bapher bapher kiba la pynshong nongrim ha ki rukom khaii pateng ha ki thain ba la kyntiew da ka ESCAP, kata kum ka  Asian Highways (AH), Trans-Asian Railways (TAR) bad ka Dry Ports networks.

Ka jingpynbha ia ki lad pyniasoh kaba kynthup ia ka Bangladesh, Bhutan, India (khamtam ia ka thain Shatei Lammihngi jong ka ri India), bad ka Nepal ba la khot ka Eastern South Asia (ESA) ka lah ban plielad ia ka khaii pateng bad ki lad ba kongsan ha ki kam karkhana na ka bynta ki ri hapoh ka thain.