Yn leit jurip ki Regional Committee ka Meghalaya Assam sha Khanduli hadien ka Independence Day

Syllad | The Rising MeghalayaAugust 10, 2023

Khnang ban weng ia ka jingiakynad kaba dang iai bteng hapdeng ki Karbi bad ki Khasi Pnar ha ka thain khappud namar ka khyrdop lum khajna ba la pynieng da ka Karbi Anglong Autonomous Council (KAAC) ha Khanduli, na ka liang ki Chairman ki Regional Committee (RC) ka Assam bad Meghalaya kin pynlong ka jingleit jurip sha ka shnong Khanduli, West Jaintia Hills District hadien ka jingrakhe ia ka sngi Independence Day.

Ia kane la pyntip da u Myntri Rangbah ka Meghalaya u Conrad K Sangma haba kren sha ki lad pathai khubor ha Ialong haka sngi Palei. Na ka liang u CM u la pdiang ba kane ka khyrdop lum khajna ka dang don haduh mynta hapoh Khanduli hynrei kam shym la don shuh ka jinglum khajna.

U CM u la ong ruh ba ka don khyndiat ka jingklumar jingmut hapdeng ka Karbi Anglong Autonomous Council (KAAC), ka sorkar Assam Government bad ma ngi ha kaba iadei bad ka jaka ba don katei ka khyrdop lum khajna.

“Ki Chairman jong ki ar  Regional Committees ka Assam bad Meghalaya kin pynlong ka jingleit jurip sha Khanduli khnang ban weng ia kane ka jingartatien khnang ban lah ban wanrah pat ia ka jingsuk ha ki thain Khanduli,” ong u CM ka jylla.

Nalor kata u Sangma u la ong ruh ba ha ka jingshisha na ka liang u CM ka Assam bad ka Meghalaya ki don ia ka jingthmu ban leit jurip sha Khanduli, hynrei namar ka jingkhim jong ka por na baroh arliang kumta ruh kim lah ban pynbeit ia ka tarik na ka bynta kane ka jingleit jurip, bad kumta ruh ki la shaniah ha ki Chairman ka Regional Committee ba kin leit jurip sha Khanduli.