Yn leit jurip u CM ia ki jaka ba shah ktah na ki jingshlei um ha Rilum Garo

Syllad | The Rising MeghalayaOctober 8, 2024

U Myntri Rangbah ka Jylla u Conrad K Sangma haka 8 tarik Risaw un pynlong ka jingleit jurip ia ki jaka kiba la shah ktah ha ka jingshlei um ha Rilum Garo bad ruh ban bishar bniah ia ka jinglong jingman baroh.

Ha kane ka jingleit jurip u CM un iakynduh ruh ia ki lanot kiba la shah ktah kiba don ha ki jaka shong shipor bad kumjuh ia kiba haiing hasem jong ki lanot kiba la khald noh na ki jingjia jong ka jingshlei um bad ki jingtwa khyndew hapoh West Garo Hills bad South Garo Hills kumjuh. 

Nalor kata ha kane ka jingleit jurip yn synran lang ia u CM da ki Myntri sorkar, MLA bad ki heh ophisar sorkar ha kaba kin leit ruh ban jurip ia kiba bun ki shnong ki thaw kiba la shah ktah ha ki jingshlei um bad twa khyndew.

Na ka liang u CM un pynlong ruh ia ka jingialang bishar kam bad ki bor pyniaid district jong ka West bad South Garo Hills ban ioh jingkhein ha kaba iadei bad ki jingshah pynjulor. 

Haba pynpaw ka jingsngewlem sha kito ki lanot kiba la duh noh ia ki dkhot jong ki longiing, kiba haiing hasem bad ki paralok parajor u CM u la bthah ruh ia ki bor pyniaid district ba kin pyllait noh mardor ia ka jingiarap pisa sha kiba haiing hasem jong kine ki lanot kiba la khlad noh.

Shuh shuh u Conrad u la pynthikna ruh ba baroh ki lad jingiarap bad ki kam maramot ia ki jingjulor ki la iaid shakhmat da kaba pynthikna ruh ba baroh ki lanot kin ioh ia ki lad jingiarap.

Lah ban kdew ba haduh mynta ki la don baroh 15 ngut ki briew kiba la duh ei ia la ka jingim bad bun ngut kiba mynsaw na ki jingjia shlei um bad jingtwa khyndew hadien ka jingther jong u ‘lapbah naduh kine ki khyndiat sngi ba la dep hapoh Rilum Garo.