Yn leit mihkhmat 3 ngut ki Khasi ha ka iakop kieng lieng bad ICF World Cup, iakynduh u CM

Syllad | The Rising MeghalayaMay 23, 2024

U Myntri Rangbah ka Jylla Conrad Sangma ha ka 22 Jymmang u la leit iakynduh bad iamir jingmut bad ki laingut ki nongking lieng (Kayak/ Canoe) ba pawkhamt ka Jylla ki ban leit mihkhmat ia ka Ri India sha ki lympung iakop kiba heh jong ki Ri ka pyrthei.

Kine ki laingut ki nongkieng lieng ki kynthup ia ka Elizabeth Vincent, Batskhem Nongbak bad u Pynshngain Kurbah kiba la shah jied ban leit mihkhmat ia ka India sha ki lympung bar ri. Ka Elizabeth marwei na Jylla kala shah jied ban iakhun haka ICF World Cup ha Prague ka ban long ha u bnai Jylliew 2024. Ki nongjop ha kane ka World Cup kin ioh ban ia aireng ha ka Paris Summer Olympics 2024.

Haba iakren bad kine ki nongialehkai, u CM u la ong, “Ka jingthmu ka jong nga ka long ban wan ban pynlut por bad phi bad ban ai khublei ia kine baroh kiba la shah jied. Kum u Myntri Rangbah ka Jylla, Nga sngew sarong na ka bynta jong phi namar ka jinglah ban pynpaw ia la ka sap wat tang ha i por ba khyndiat.” U CM ula plie ia ka Rafting Project ha ka shnong Umtham ha u bnai Naitung 2023.

Kine ki laingut mynta ki la don ha ka thup jong ka kynhun na ka ri India ki ban leit iashim bynta ha ka International Canoe Slalom Tournament, ka ban long ka ri Russia ha u Nailur mynta u snem.

Ka Elizabeth Vincent, 26 snem rta na Ri Bhoi kaba la shah jied ha ka World Cup, ka la sdang ia ka jinghikai lyngba u Coach uba dei ruh u kpa jong ka u Ian Vincent hajan ka shnong Umtham .Ka la mihkhmat ia ka Meghalaya ha kiba bun tylli ki jingiakop hapoh ka ri kaba kynthup ha ka National Games, ka Malabar River Festival, bad ka  Tawangchu Tides Festival ha Arunachal Pradesh.

Katba u Batskhem Nongbah 18 snem rta bad u Pynshngain Kurbah 19 snem rta ki la wan iashim bynta ha ka Khelo India Games 2022. U Batskhem uba dei na ka shnong Umtham bad uba la shah hikai ruh ha u Ian Vincent u dei uba trei kum u nongbylla sngi hynrei uba don ia ka thong ha ki kam ialehkai sports bad iashim bynta ha ki jingiakop.

U Pynshngain Kurbah na Labyrwa u la sdang ia ka kam king lieng naduh ba u dang rit ha ryngkat u coach u Ian Vincent ha kaba u la ioh ruh ban khur ia ka takma rupa ha ka Khelo India Games 2022. Nalor kata u la leit ruh ban mihkhmat ia ka Meghalaya ha ka Malabar River Festival events ha Madhya Pradesh.

U Sangma u la iamir jingmut bad kine ki nongialehkai kynthup bad ki coach bad ki nongialam na ka Jylla ha ka jingiadon lang u Dr. Wilbur Manners, President ka MCA, u Bah Zorba Laloo, dklhot ka MCA bad u coach, u Ian Vincent.

Ka Shnong Umtham, Ri Bhoi ka la kylla long ka jaka ha kaba la pynlong ia ki jingiakop ialehkai sports bapher bapher kiba dei hapoh ki jaka um, kata kaba kynthup ia ka Megha Kayak Fest, ka rynsan iakop ha kaba la wan iashim bynta da ki nongialehkai na kylleng ki ri ka pyrthei, bad ha kane ka jaka la lah ban pynlong ia hynriew tylli ki jingiakop kat haduh mynta, kata nalor ka jingpynlong ia ka rafting bad IKCA Selection Trials ha ka 18 bad ka 19 tarik mynta u bnai.