Yn mih khmat ki thei ka Tyrsad SS & Assam Rifles Public School iaka East Khasi Hills haka State Level Subroto Cup

Syllad | The Rising MeghalayaJune 15, 2024

Ka kynhun ki thei ialehkai football ka Tyrsad Secondary School bad ka Assam Rifles Public School kli long ki artylli ki skul kiba la ioh ba kin rah ia ka nam lahduh jong ka lympung ialehkai District Level Subroto Cup Football Tournament, ba la pynlong ia ka da ka ophis ka jong u District Sports Officer ka East Khasi Hills District.

Ha ka jingiakhun ia ki phainal kiba la long haka 15 tarik Jylliewha madan ka MFA Turf Third Ground, Polo, na ka liang ki thei ialehkai jong ka Tyrsad Secondary School, ki la lah ban pynliem noh ia ka Umpohliew Jingtip Higher Seconadry School da 1-0.

Ia kane ka shi kol ba kordor tam jong ki thei ialehkai ka Tyrsad SS la thep ia ka ha ka minit kaba 9 da ka  Lapdianghun Rani.

Haba phai sha ka phainal ka U-15 ki khynnah shynrang, ka kynhun ialehkai ka Assam Rifles Public School, ki la lah ban pynliem noh ia ka Umphyrnai Presbyterian Secondary School, da 1-0 bad ia kane ka kol la thep ia ka ha ka minit kaba 6 da u Thanggoulum Vaiphei.

Haba phai pat sha ka phainal ka U-17 ki khynnah shynrang sa shisien pat ka kynhun ialehkai jong ka Assam Rifles Public School, ki la ioh ban rah ia ka jingjop, kaba la wan hadien ba ki la pynliem noh ia ka  Umphyrnai Presbyterian  Secondary School lyngba ka tie breaker kaba long da 4-3, namar haduh ba kut ka por ba la buh, ki ar kynhun ki la lah shwa ba kin iakhaid khlem da don mano mano ba la lah ban pynkhih ia ka jar.

Ha kaba kut jong baroh ki lai tylli ki phainal na ka liang ka ophis jong u DSO EKHD u la sam ruh ia ki khusnam nongialehkai kaba kynsai, kaba ha ka liang ka U-17 ki khynnah kynthei ia kane ka nam la rah ia ka da ka Ibashembha Khongsit Tyrsad He Sec School, katba ha ka U-17 ki khynnah shynrang u player ba la ioh ban rah ia kane ka nam dei u Banlamkupar Rynjah Umphyrnai Presbyterian Hr Sec School bad ha ka U-15 ki khynnah shynrang u player ba la rah ia kane ka nam dei u Medonbanshan Kurkalang  Assam Rifles Public School.

Ha kane ka sngi la wan ban sakhi lang da u Secretary ka MFA bad jong ka SSA u bah Sunesh Syiem bad bah DL Nongbri, vice president MFA bah Cliff R Nongrum, Football Secretary ka SSA bah Freddy Kharpran, bah Hering Shangpliang, ia kaba la pynshit pynshngain da ka jingwan ban sakhi bad ai mynsiem da ki nonghikai bad ki khynnah skul kiba la iakhun ia ka phainal.

Kumban shu bynrap hangne ba kine ki lai tylli ki skul kin ioh ruh ban mihkhmat ia la ka jong ka district sha ka kyrdan iakhun ka State Level Subroto Cup ban sa pynlong pat ia ka da ka ophis jong ka Directorate Of Sports & Youth Affairs.