Yn myntoi 500 ngut ki nongrep na u Strawberry, sdang ka Myntri ban sam symbai na Syntung Nohron Cluster

Syllad | The Rising MeghalayaDecember 8, 2023

Ban kyntiew ia ka kam rep Strawberry, ka Myntri ka Tnat ka rep ka riang ka sorkar Jylla, ka  Dr. M Ampareen Lyngdoh haka sngi Palei ka la pynlong da ka jingsam ia ki tiar bad tynrai Strawberry sha ki nongrep ha Syntung -Nohron Cluster bad leit jurip ruh ia ki jaka rep ia une u jingthung ha kane ka shnong kaba hap hapoh Mawkynrew Community & Rural Development Block, East Khasi Hills District.

Ha kane ka sngi la ia don lang ruh ka Secretary ka sorkar Meghalaya, ka Kong Isawanda Laloo, IAS, Director of Horticulture, Kong D Sohtun lem bad kiwei pat ki heh sorkar.

Na ka liang ki nongrep kin ioh ruh ia ki jingkyrshan lyngba ki tiar jingsong bad na ka bynta kumno ban pyniaid iew ia ki. Ka projek na ka bynta kane kan kynjoh sha kumba 2 klur tyngka.

Ki paid nongrep kin ioh ia ki jingiarap lyngba ki tiar kiba iadei bad ka jingrep ia u Strawberry nalor ki tiar pynioh um ia ki jingrep lyngba ka Mission for Integrated Development for Horticulture and Fruit Development Scheme.

Nalor kata ki nongrep kila iarap da ka sboh ba khlem khleh dawai bad ka kam bylla bad kiwei pat ki bynta kaba iadei ban sumar ia une u jingthung. Kane ka jingiarap kan long da shisha ka jingkyrkhu kaba khraw na ka bynta ki nongrep namar une u jait jingthung (Strawberry) la tip bha ba u dei uba pynioh nong shibun.

Ha kane ka samoi ban thung ia une u mar rep, kane ka tnat kan sam haduh kumba 6 lak ki tynrai sha ki kynhun nongrep strawberry hapoh Garo bad Khasi Hills, kata sha kumba 500 ngut ki nongrep.