Yn nang pynjur ka JAC iaka jingiakhih, kuman ki kharkhana dewbilat ban ai bai kit thymmai

Syllad | The Rising MeghalayaNovember 5, 2020

Ka Joint Action Committee (JAC) kala rai ban nang pynjur iaka jingiakhih kaba khlem buh por lada ki kharkhana dewbilat kim pyntreikam iaka dor bai kit kaba thymmai hapoh 10 baje mynstep haka 7 tarik une u bnai.

Ka JAC kaba kynthup Jaintia Hills Truck Owners and Driver Association (JHTOA), Meghalaya Truckers Union (MTU) bad ka All Jaintia Hills Clinkers and Cement Association (AJHCCA) kila sdang iaka jingiakhih kaba khlem buh por haka sngi Palei bad pynphai ia baroh ki trok kiba kit dewbilat ha Tuber Shohshrieh, East Jaintia Hills District.

Haka por nohphaisngi u Deputy Commissioner ka East Jaiñtia u Bah E. Kharmalki IAS ula khot iakren iaki nongialam ka JAC bad ka JHCMA.

U DC ula hukum ïaki karkhana pynmih khyndew bilat ban pyntreikam mar dor ïaka dor bai kit mar ba la pynmih da ka sorkar Jylla haka 25 tarik Nailur 2020.

Ka JAC da ka jingbitar halor ka jingbymburom jong ki karkhana pynmih khyndew bilat ïaka hukum jong sorkar Jylla kala rai ban aipor haduh 10 baje lashai mynstep.

Hashuwa kane jingiakren ka JAC kaba sdang iaka jingiakhih kala pynphai haudh 80 tylli ki trok bar jylla kiba kit dewbilat iaki company dewbilat Shohshrieh.

“Lada ki karkhana kim pyntreikam iaka dor thymmai ba la buh da ka sorkar ngim ailad ba ki trok kit mar jong ki kharkhana kin iaid bad ngi ruh ngin nang pynjur iaka jingiakhih,” ong u Nidamon Chullet President JHTOA.

Ka dor ba la pynmih da ka sorkar Jylla haka 25 tarik Nailur (September) 2020 haka jingpynbna (Notification) NO.TPT.91/80/813 ka la pynthymmai ïaka dor bai kit mar ki trok kata T.7 haduh T.11 shi kilometre shi ton ha ki surok rong, T.8 haduh T. 12 shi ton shi kilometre haki surok maw bad T. 10 haduh T. 12 shi ton shi kilometre ha ki surok khyndew.