Yn nym pynduh bor ïaki District Council kular u Conrad
JOWAI: Ka Jaintia Hills Autonomous District Council (JHADC) kala kyntu ïa ka Sorkar Jylla ban kan pynneh ia ka kyndon aiñ ban shim ‘No Objection Certificate’ na ki Autonomous District Council ban pyndonkam ia ki jaka puta ban tih mawshun.
Ka daw ba JHADC kala dawa ban pynneh ïa ka aiñ kaba rim namar ba ka jingpynkylla thymmai ka ktah ïaka rukom bat khyndew bad ka bor jong ka konsil.
![](https://www.syllad.com/wp-content/uploads/2024/09/JIT-Vacancy-823x1024.avif)
Ka JHADC kala pynpaw ba ka tnad Mining and Geology lyngba ka notification No.MG.49/2011/Pt-I/86 tarik 24/01/2019 kala pynbna ba la pynkylla thymmai ne amendment ïaka Meghalaya Minor Minerals Concession (third Amendment) Rules, 2018″ ha kaba kala pynduh pyndam noh ia ka kyndon ba donkam ia ka NOC na ki Autonomous District Council, hynrei lada dei ki company, kharkhana ne u bar jylla ki hap ban shim NOC.
Namar ba kane ka jingpynkylla thymmai ka ktah ïaka bor jong ka konsil bad ka rukom bat khyndew, ka konsil kala banjur na ka sorkar jylla ba ka dei ban pyndam ïaka Rule 6 (1) jong ka Mining Lease haka clause (g), bad dawa ban pynneh biang ïaka kyntien ba donkam ban shim ‘No Objection Certificate’ na ki District Council.
Ka JHADC lyngba ka dorkhat bala leit ai sha u Chief Minister Conrad K Sangma da u Chief Executive Member u Ma Thombor Shiwat lem bad kiwei kiwei ki MDC ha ka Sngi Thohdieng ka la ong ba katei ka jingpynkylla ia katei ka ain kan ktah ia ka rukom pyniaid ia ka jaka puta ha Ri Lum bad pyntlot bor ia ka District Council.
U Chief Minister u la kular ia ki MDC jong ka JHADC ba yn pynthikna ba ka bor jong ki District Council kin nym shah ktah ne pyntlot bad kumjuh ruh ula ong ba un khmih bniah ia ka hukum jong ka Supreme Court bad Meghalaya Minor Minerals Concession (third Amendment) Rules, 2018.
Haba iadei ba ka jingtih dewiong katkum MMDR Act, 1957 bad Mineral Concessions Rule, 1960 lyngba ka hukum jong ka Supreme Court, ka JHADC ka la ong ba lehse ka Sorkar Jylla kan nym lah shuh ban lum khajna halor u dewiong namar ka bor ban ai jingbit kan shong bad ki trai jaka ryngkat bad ka jingbit jong ka Sorkar Kmie. Te kumta ka JHADC ka kyntu ia ka Sorkar Jylla ban khmih bniah halor kane ka kam khnang ba ka Sorkar Jylla bad ki District Council kin nym duhnong na ka khajna na ka jingtih u dewiong.
Ka dorkhat ka ong ba ka Supreme Court lyngba ka MMDR Act, 1957 bad Minerals Concessions Rules, 1960 ka la ai bor ia ka Sorkar Jylla ban khmih halor ka jingtih dewiong ban khang ia ka jingtih beain ia u dewiong bad jingshalan u dewiong lyngba ki ain ki kanun wat la ka bor ban ai jingbit ia ka jaka puta ka shong ha ki riew shimet.
Ka JHADC kala ban jur ia ka Sorkar Jyllla ban kynthup lang ia ka District Council haba shna aiñ ne kyndon ban lum fees ha ka jaka jong ka khajna.
Leave a Reply