Yn pan jingshai u Myntri ba ialam bakla ka Tnat Social Welfare halor ka Lineage Act, 1997

Syllad | The Rising MeghalayaDecember 1, 2023

U Myntri ka Tnat Social Welfare ka sorkar jylla u Bah Paul Lyngdoh haka sngi Thohdieng u la ong ba un sa pan jingshai ha kaba iadei bad ka jingshah kynnoh ialam bakla halor ka shithi ba la pynmih da kane ka Tnat ha kaba iadei bad ka KHAD (Khasi Social Custom of Lineage) Act, 1997.

Haba kren sha ki lad pathai khubor u Bah Paul Lyngdoh u la ong, “Nga la pan ia ka file kaba iadei bad kane phang bad Ngan bishar bniah ha kaba iadei bad kane ka bynta.”

Kane ka jingpynpaw jong u Myntri ka la wan long hadien ba ka Seng Hynñiewtrep Youth Council (HYC) ha ka sngi Balang ba la lah ka la dawa na ka sorkar jylla ba kan pyndam noh mardor ia ka shithi ba la pynmih da u ophisar jong ka tnat Social Welfare kaba batai bakla ïa ka KHAD (Khasi Social Custom of Lineage) Act, 1997.

Ka HYC ka la ong ba katkum kane ka shithi kane ka Lineage Act kam shym la khang satia ban ai syrnot ST sha u/ka nongaplai da kaba shim bujli ia ka jait la ka long na u kpa ne na ka kmie bad kaba shah ruh ban pdiang ia ka jait jong u tnga da ka kynthei ka bym dei ka Khasi.

“Ka long kaba sngew lyngngoh ba la pynmih ia kaba kum kine ki shithi jingpyntip namar ha kaba iadei bad ki kyndon treikam shisien ba la mynjur ia ka bill da ka Council bad ioh ia ka muhor na u Lat, kata ka mut ba ka la iaid lyngba ka jingbishar bniah da ka sorkar jylla,” ong u Bah Paul.

“Kam dei ban don kano kano ka shithi jingpyntip ka ban lah ban pyntlot ia kano kano ka bynta jong ka ain khamtam ha kaba iadei bad ka Act kaba la ioh ia ka jingmynjur na u Lat,” ong u Bah Paul Lyngdoh.