Yn phah saiantist ka CAU Imphal sha Jaintia ban rep ia u kba ba heh san haka shlei um

Syllad | The Rising MeghalayaMarch 21, 2020

U Dean ka College of P.G for Agriculture Science, Umiam, Ribhoi District, kaba dei tnat jong ka Central Agriculture University, Imphal, Manipur u Prof. NB Singh (Ph.D, FISGPB) ula ong ban un phah ïaki saiantist sha ki hali ki pynthor ha Rilum Jaiñtia ban rep ïa u kba CAU-R1 uba ym don jingktah haka jingshlei um.

Une Professor haba iohi iaki jaka rep da la ki jong ki khmat haka jingwan hiar sha Pynthor Nein, Jowai  ula ong ba u long uba kloi ban iarap iaki nongrep hapoh ka lama jong ka All Jaiñtia Farmers Welfare Union, Jowai ban rep bad ban thung tit ban ri jingri ban kyntiew iaka ioh ka kot jong ki nongrep.

Kane ka skul bah ka rep ka riang kala ai sngewbha ïa u kba CAU-R1 haduh san ser marwei (5 KG) sha ki ar phew san ngut ki dkhot ka ka All Jaiñtia Farmers Welfare Union. Une u kba kine ki nongrep kin pyrshang ban rep kin sa ia sam kylliang bat ha ka aiom rep ka ban wan ban ïoh ban rep khambun ha kane ka thain.

Nalor kata u Prof. NB Singh ula ong ba wat ka koleg ruh kan thied ia u kba na ki nongrep ban sam sha kiwei pat ki nongrep ba kin lah ban rep khambun ia une u jait kba.

Ha kane jingwan u Dean kane ka kolej jong ka kam rep kam riang la iadonlang u Dr A.K.Singh, u Dr RK Josmee Singh kiba dei ki scientists, ki nonghikai ka College. La iadonlang ruh u B Richard Uriah u Principal ka North Liberty Higher Secondary School, Jowai bad u Ma KL Pariat, Adviser ka Seng.

U Principal North Liberty Ma B Richard Uriah ula kren ai bor ai mynsiem ia ki nongrep kiba don kylleng ka jylla bad khamtam ia kiba ha rilum Jaintia ban nang kyntiew shuh shuh ia ka jingrep kba  ban pyndap bam iaka jylla bad ula kyntu ia u Dean kane ka kolej ban ai jingiarap shuh shuh ia ki nongrep ban hikai ia ki kumno ba ki nongrep kin nang ban shna sboh khnang ban myntoi ki nongrep kba nongrep jhur

Ka All Jaintia Farmers Welfare Union ka kyntu ia baroh ki nongrep, ki nongri jingri, ki trai hali ne jaka rep ha kylleng ka rilum Jaiñtia ban sngewbha ban ia mih shakhmat ban iatreilang ryngkat bad ka seng ban wad ki lad ku lynti ba ioh ia shibun ki jingiarap namar ba ka sorkar Meghalaya bad ka sorkar India ki la don shisha ka jingthmu ban pynmyntoi ia ki nongrep khnang ban im ka ri bad ka pateng ka ban sa wan.

Ka All Jaintia Farmers Welfare Union, Jowai kadei ka seng kaba dang thaw dangshen haka 8 tarik u Rymphang 2020 ha Jowai bad u ma Jurbha Phawa udei u President, u Ma Medrik Suna bad Ma Phrangsngi Sutnga kum ki Vice President, General Secretary-Kong Marche Suna.  Assistant General Secretary-Kong Martha Lyngdoh, Treasurer-Kong Maya Rymbai, Adviser-Ma K.L.Pariat bad ki executive member ki don ar phewsan ngut.