Yn phai khmat ka sorkar ban kyntiew ia ki nongrep ha Ri Lum Garo da kaba rep kba tlang

Syllad | The Rising MeghalayaJune 10, 2019

TURA: U Myntri Sorkar Jylla ba dei peit ia ka tnad ïaka kam rep, u Bah Banteidor Lyngdoh, ha ka sngi Nyngkong u lum ïa ka jingialang ban ïamir jingmut bad ki ophisar ka tnad Agriculture bad Horticulture na baroh san tylli ki district ka Ri Lum Garo ban kyntiew ia ki nongrep ha Orchid Polo,Tura .

Kane ka jingialang ba la khot da u myntri ka long ban twad jingmut na ki ophisar ha kaba ia dei bad ka jingpyn tyllun ia ki skhim sorkar jylla ne sorkar pdeng ban kyntiew ia ki nongrep ha Ri Lum Garo bad ban wad ki lad ki lynti ban kyntiew ia ka ioh ka kot ki nongrep.

“Ngi la ia mir jingmut halor bun kiei kiei bad ki ophisar ka tnad Agriculture bad Horticulture ngi shem bun ki jingeh hynrei ngi na ka liang ka sorkar kan ialeh ban kyntiew ia ka ioh ka kot ki nongrep”, la ong u bah Banteidor ha ka jingiadon lang u MN Sangma, District Horticulture Officer bad ka Susanna M Sangma, Joint Director ka tnad Agriculture.

Da kaba pynpaw ba ka sorkar dang shen ka la pynithuh ia u sohmarit bad sla tyrpad kum ki mar rep. “Ngi la iakren halor kane ka bynta bad ka sorkar ka la leh ia ka kam ka ban long ka jingmyntoi na ka bynta ki paidbah nongrep ka jylla Meghalaya hi baroh kawei”.

Na ka bynta ka Ri Lum Garo, u myntri ula iathuh ba u kba tlang (Boro/Winter Paddy) u wei u jait jingrep ban kyntiew ia ka ioh ka kot ki nongrep ha kaba ka Selsella C&RD Block ka dei kawei ka jaka kaba biang bha ban rep ia une u mar rep u ban nym shah ktah ha ki bor mariang kum ka umsaw lada jia ba dei ha ka por lyiur, la ong u Myntri ka kam rep.

Na ka liang ki ophisar ki la iathuh ba ka long kaba sniewbok ba ha ki snem kiba la dep ka sorkar ka mang duna palat ka pisa na ka bynta ki tnad ban kyntiew ia ka kam rep ha Ri Lum Garo bad kumjuh ruh ba ki tnad kam rep ki duna nongtrei.