Yn plie noh shen ïaka jaka sumar thymmai ka Ganesh Das Shillong bad Jowai M&CH

Syllad | The Rising MeghalayaJune 5, 2019

JOWAI: Ka JSU central body bad ka JSU (shillong circle) kala leit ban ïakynduh bad ai da ka dorkhat ha u Bah AL Hek Myntri ka tnad koit khiah bad dawa ban plie noh iaka building thymmai jong ka Maternity and Child Health hospital kaba don ha Ganesh Das Shillong haka sngi ba ar.

Ka JSU hadien ba kala ioh shibun ki jingujor na ki nongpang kiba wan kha khyllung ha kane ka hospital bad na kawei ka longkmie ba ka hospital kam lah ban pdiang ïaka ban kha ia i khunlung hapoh kane ka hospital namar bym don ki kor ki bor ki ba biang khamtam ka jingbym don ka Neonatal Itensive Care Unit (NICU), ka jaka sumar ïaki khunlung bym dap bnai kala leit ban kha ïa i khun sha Narzareth hospital kaba buh iaka ha ka jingeh kum ka briew kaba duna ka ioh ka kot bad na ka liang ka seng ki la leit ai jingiarap ryngkat bad kiwei pat ki kynhun trei mon sngewbha ban pyllait ia kane longkmie na ka jingsiew kaba heh bad ka hospital ruh ka lah iarap ban pynduna ia ka dor jingsumar ia i khyllung ba dang kha.

U President JSU Shillong Circle, Treiborlang R Suchen bad kiwei kiwei ki dkhot kila leit ban jurip bad wad bniah ia ka jingduna hapoh ka Ganesh Das hospital bad ki la ia kynduh ruh ia ka Superindent Medical Officer ka Doctor Wanswett.

Ka JSU kala kam ba nalor ka jingduna ki tiar ki tar ban sumar, kane ka jaka sumar ka duna nurse bad doktor ban ai jingshakri ïa u nongpang bad la dawa ban pynbun nongtrei ha kane ka jaka sumar.

Ia kane ka dorkhat la ai ruh sha u Director jong Medical Health Officer, East Khasi Hills.

Ka JSU ka dawa ban plie noh ia ka additional building jong ka Ganesh Das Hospital ban pynduna ïaka jingkhapngiah ka aspatal, ban pynbiang ïaki Ventilator ha PICU kaba don tang kawei ha ki 6 tylli ki jingthiah.

Ka JSU ka dawa ruh ban plie noh iaka Maternity and Children Hospital kaba don ha Jowai, Panaliar ban pynsuk iaki nongkha khun kiba wan na kylleng bad ban kham pynkylluid iaka Ganesh Das hospital ha Shillong bad ban pynbiang iaki jingdonkam ka jaka sumar ha East Jaintia Hills District kumjuh.

U Treiborlang Suchen u la iaroh ia ka sorkar na bynta ka jingioh jingmyntoi ki paidbah na ka MHIS card wat la ki jaka sumar sorkar ki don ha kylleng ki jaka ki duna haki kor ki bor namar ba lyngba kane ka card ki ioh ka jingmyntoi ban siew na ka bynta ka jingshah sumar haki aspatal shimet.

Ka JSU kala pynpaw ba u Myntri ka koit ka khiah ula kular shimkhia ban pynbiang iaki kor ki bor ha Ganesh Das Hospital bad ban plie iaka jaka sumar thymmai ha u bnai Naiwieng bad iaka Jowai Maternity and Childrens’ Hospital yn plie mynta hi u snem.