Yn pyndep ia ka jingmaramot bad pynkhlain ia ka jingkieng Umiam hapoh ka 30 tarik u Jylliew: Goyal

Syllad | The Rising MeghalayaApril 25, 2024

U CMD ka Tnat  MeECL u Sanjay Goyal ha ka 24 tarik Iaiong u la pyntip ba ka jingmaramot bad ka jingshna pynkhlain ia ka  jingkieng Umiam (Dam) la buh thong ban lah ban pyndep noh hapoh jong ka 30 tarik u bnai Jylliew u ban wan.

Ia kane ka jingmaramot bad ka jingshna pynkhlain ia kane ka jingkieng Umiam kaba dang iaid mynta shakhmat la pyntrei da ka Dam Rehabilitation Improvement Project (DRIP). Ka thong kaba kongsan jong ka DRIP ha kaba pyntrei ia kane ka projek ka long na ka bynta ban maramot kumjuh ban pynkhlain bad pynjanai ia ki dam na ka bynta ka jingshngain.

Ki jingpyntrei kiba kongsan tam hapoh ka DRIP ka kynthup halor ka jingleh ia ka Drilling bad Grouting na ka bynta kane ka dam bad ban maramot ia ki jingorpait nalor ki bynta kiba iadei bad ka Hydromechanical work.

Na ka liang u Goyal u pyntip ba haduh mynta la lah ban pyndep kumba 60% ki bynta kiba iadei bad ka drilling bad grouting kiba iadei bad ka jingmaramot ia kane ka jingkieng Umiam, bad katkum ka kaiphot bala ioh la shem ba ka jingpei um kala duna bha na ka dam.

Ula ong “Ia kane ka jingpyntrei la khmih lynti ba yn lah ban pyndep noh hapoh jong ka 30 tarik u Jylliew u ban wan, kata ia kaba yn lah pat ban plie pura ia kane ka jingkieng Umiam na ka bynta ka leit ka wan jong ki kali na baroh arliang surok,” 

Ha kaba iadei bad ka jingpynkhlain biang ia ki paia kiba kyrshan ia ka jingkieng, u Goyal u la ong, “Da kaba pynshong nongrim lyngba ka technical report ba la ai da ka IIT Guwahati bad hadien ka jingjurip bniah kane ka jingkieng sa shisien pat ka la wanphai biang sha ka dur kumba ka long naduh ba la tei ia ka.

Watla katta la pyntip pat ba hapoh ka 30 tarik Jylliew 2024, tang ki kali ba hapoh 4 metric ton yn shah ban iaid na kane ka jingkieng bad hadien ka 30 tarik Jylliew, tang ki kali kiba hapoh 12 metric ton yn shah ban iaid ban lah pynthikna ia ka jingshngain kaba neh slem jong kane ka jingkieng.

Ia ka jingkieng Umiam la shna naduh u snem 1958 bad la lah ban pyndep ia ka ha u snem 1965. Baroh shi katta phew snem kane ka jingkieng ka la hap kyrda ia ka jingiaid jong ki kali ba khlem sangeh-bad barit bad baheh bad kumjuh ruh kiba kit mar haduh ba kala shong synjor bad buh jingma namar ka rta kaba la slem bah.