Khlem jingteh jingkhum ia u paidbah yn pyndep ka Seinraij Jowai iaka Behdieñkhlam

Syllad | The Rising MeghalayaJuly 6, 2022

Ki riewngeit Niamtre jong ka Seinraij Jowai kila long kiba la pynkhreh ban pyndep iaka jinglehniam Behdieñkhlam ba saw sngi mynta u kynti kumba ju long ka rukom khlem kano kano ka jingteh jingkhum ia u paidbah ban iashimbynta. Ka Behdienkhlam mynta u snem kan sdang naduh 11 tarik bad kan kut haka 14 tarik Naitung 2022.

Ia kane la ong da u President Seinraij Jowai Ma OR Shallam haba kren bad ki nongthoh khubor haka sngi Balang ha ophis jong ka Seinraij ha Loompyrdi Iongpiah. Ula ong ba ka Behdieñkhlam kumba la tip ba ka jingthmu hi ka long ban beh iaka khlam bad mynta ka kynti ka jinglehkmen ka iatakhuh bad ka lyngkhuh snem ka jingioh jylla ba 50 snem pura bad ka jingioh laitluid ba 75 snem.

Ia ka Behdieñkhlam la kyrshan da ka Ministry of Tourism, NEC, ka sorkar Jylla bad ka JHADC.

U Ma Shallam ula ong ba ka jinglehkmen Behdieñkhlam festival ha une u snem kan pher hadien bala lait na khlam bad ki adong adit COVID-19, ym kumba la jia ha ki ar snem 2020-21 bad ki paidbah ki lah ban iashimbynta khlem kino kino ki jingteh kyndon.

“Katkum ki dak ki shin ha ki jinglehniam kiba la sdang naduh u Kyllalyngkot la kyrmen ba ngin ban pyndep iaka Behdieñkhlam kumba ju long, katta ban ioh lehkmen da ki rong ki rup bad ka shad ka kmen,” la ong u Ma Shallam.

Ka dei ka por ba ngin lehkmen haduh ban da hun bad ngeit skhem ba Behdieñkhlam kan wanrah iaka rep ka riang kaba bha bad ba kan beh shajngai iaka sniew ka smeh ka imlang ka sahlang bad ba ka jingbha kan jop iaka jingsniew ka pyrthei, la ong u ma Shallam bad bynrap kumba ka India la ong ba ka dei ka ri kaba iatylli wat hapdeng ka jingiapher bad har rukom ki jingngeit bad ki jaidbynriew ba bunjait, kumta ula khot la wer ia baroh ban wan sakhi iaka Behdieñkhlam bad ban sakhi iaka jingriewspah ka kolshor bad ka riti ka dustur.

Ula iathuh ruh ba mynta wat ka jaka peit ruh kala heh wat lah ym pat dep hynrei kan kylluid bha iaki nongwan sakhi banpeit iaka shad Behdieñkhlam ha pung aitnar. Kane ka jaka peit kai kadei kaba la bei pisa da ka Ministry of Tourism bad pyntrei da ka sorkar Jylla.

Ki kynrem ki lyndan ban wan sakhi ki kynthup ia u Justice Sanjib Banerjee Chief Justice of Meghalaya High Court nalor u Chief Minister, Minister bad kiwei kiwei.

U Dolloi Ma Puramon Kynjing haba kren ula ong mynta ka kynti ka jinglehniam kala pher bad kila ioh ring pynhiar mynsiem bala lait na ka khlam ka ngoh bad ngeit skhem ba da ka jingri jingsumar u nongbuh nongthaw kin pyndep iaka jinglehniam baroh katkum ka rukom kaba ju leh bad ka Behdieñkhlam kan long kaba iaid beit iaid ryntih

“Ka jingshlei um dangshen kala wanrah ka jingjulor kaba bun ha ki pyntha kba ha baroh ki shi lynter ka Myntdu, bad ngi kyrmen ba da ka jing pyndep iaka nguh ka dem ngi kyrmen ba u Trekirot un theh ka jingkyrkhu ban bha ban miat u khaw u kba,” la ong u Dolloi Puramon Kynjing bad kyntu ia u wei pa uwei ban tynrong halade iaka jingkitkhlieh ban tyngkai iaka sawdong sawkun ka mariang bad ban beh iaka sniew ka smeh ka imlang ka sahlang.