Yn pyndep ka Seng Khasi Kmie iaka jingleh niam Pyneh Rngiew ha u Lum Sohpetbneng

Syllad | The Rising MeghalayaJanuary 27, 2022

Ka Seng Khasi Kmie, Shillong, ka pyntip ba na ki daw ka jingiai bteng ban lyngshop ka khlam jingpang COVID-19, da kumta ka jingia mih paidbah ban pyndep ia ka kam Kiew Eh Rngeiw kaba shi sien shi snem, yn hap ban pyrkhing bad bud ryntih bha ia ki kyndon kat kumba la dep ban pruid dak da ki bor synshar.

Ha u kyrwoh bala pyllait haka sngi Palei, U Rgh D.K Dkhar, President Seng Khasi Kmie ryngkat ka jingiadon lang u Rgh Haines Marbaniang General Secretary bad u bah I. Sun Chairman Lum Sohpetbneng Committee, ki pynpaw ba ha ka 30 tarik mynta u bnai kaba dei ka jinghap ban pyndep ia ka lehniam kaba shi hat shi taiew, ka jingiadon bynta ha kane ka sngi katta ka nguh ka dem ha Lawnongthroh bad kumjuh ha ka Mei Mawbuh, kin dei tang ka Komiti ka jong u Tymmen U San, ki dkhot jong ka Lum Sophtebneng Committee bad dkhot ka Jylli Pyrkhat Kam Seng Khasi Kmie.

Na ka liang u Rgh D.K Dkhar, President Seng Khasi Kmie, u ong ba kine ki jingpynmih ia kine ki jingmana, ka long ban iada na ka jingwan ban lyngshop biang jong ka khlam ka ngoh Covid 19 kaba dang iai kiew sted ha kine ki nsgi ki ia,

Kumta haba iadei bad kane, kum u nongialam ba hakhmat eh jong ka Seng, u Rgh D.K Dkhar u panmap na  baroh ki parakur parakha para kher paramer, ba kane ka jingpynmih ia kane ka jingpynbna ka long hadien ba la ia shong pyrkhat sani bad puson bha naka bynta ka bha ka miat uba lum uba lang.

U Rgh D.K Dkhar u la ieng ban pynkynmmaw ba kum ka jaidbynriew ba Tip Briew ba Tip Blei ba ksoh ha la ka niam tynrai ka bri u 7 trep 7 wasa, ba ri la akor bad burom, ban long kiba sngewthuh bad kiba shemphang bad ban bud ryngkhi ia kitei ki jingpynbna ne ki jingmana, kaban long artad kum shi bynta ka nuksa ne ka nongmuna ia la ki khun ki sikew bad ka pateng kaban wan, ban ban lait na ka jingwan ban lyngshop ka khlam ka ngoh bad ba kiei ruh kin bud ia ka nuksa ba bha.

Shuh shuh la mana ruh ia kino kino ki briew ba kim; lah ban wan ban buh ne plie ia la ki dukan die sha die ja ne ia kino kino ki jingdie hapoh u pud u sam jong u Lum Sohptebneng ba hapoh ka jingpeit ne khmih ka Seng Khasi.