Yn pynieng ka Sorkar da ka jaka scan ia u drok ha Ri Bhoi bad East Jaintia Hills: Paul Lyngdoh

Syllad | The Rising MeghalayaNovember 14, 2024

Ha ka jingpyrshang jong ka Sorkar Jylla ban tehlakam ia ka jingwan rung jong u drok shapoh ka Jylla, u Myntri ka Tnad Social Welfare u Bah Paul Lyngdoh ha ka 14 tarik u Naiwieng u la pynbna halor ka rai jong ka Sorkar ban pynieng noh da ka kor Vehicle Scanning Machine (VSM) hapoh Ri Bhoi bad East Jaintia Hills District.

Haba kren sha ki lad pathai khubor hadien ka jingialang jong ka Drugs Reduction Elimination & Action Mission (DREAM), u Bah Paul u la ong, “Ngi la iamir jingmut halor ka jingdonkam ban pynieng da ki kor VSM ha khappud Ri Bhoi bad East Jaintia Hills kiba dei ki jaka rung ba kongsan sha ka Jylla ha kaba baroh ki kali kiba wan rung kin hap ban iaid lyngba kine ki kor, kata ia kaba yn pyndep ia kane ka kam hapoh ka hynriew bnai.

U Myntri u la pyntip ruh ba ka jingialang ka la rai ban nangpynkhlain shuh shuh ia ka Tnad Anti Narcotic Task Force (ANTF) na ka bynta ban iakhun pyrshah ia ki kam khaii drok ha ka Jylla.

“Ngi la kyntu ia ka DG ba kan pynkhreh ia ka jingtyrwa halor ka jingdonkam ia ki briew kiba lah ban don beit thik hapoh ka Tnad ANTF khnang ba yn lah ban nangpynkhlain ia ka jingiakhun pyrshah ia ki kam khaii drok. Ki kam khaii drok kiba long ka jingma kaba khraw ia ka Jylla namar ka jingiajan bad ki jaka rung jaka mih jong ka iew drok kaba don ha Myanmar bad namar ka jingshisha ba ka jylla ka don ia ki lynti iaid kiba jngai kaba iaid lyngba napoh Ri Bhoi shaduh East Jaintia Hills,” u la ong.

U la ong ruh ba ia ka Meghalaya Police Act, 2010 yn sa pynkylla noh khnang ban lah ban pynbit pynbiang ia ki jingdonkam kiba iadei bad ki volunteer kiba dei shibynta jong ka Village Defence Party (VDP).

“Ka jingdon jong ki VDP Volunteer ruh la dep ban buh beit 15 ngut kawei ka party khnang ban pynthikna ba ha ki jaka kiba kham duna nongshong shnong, ngin lah ban ioh ia ki briew kiba donkam,” u la ong da kaba bynrap ba la shim ruh ia ki sienjam ban kyntiew noh ia ka jingsiew na ka bynta ki VDP Volunteer.

Ha kaba iadei bad ka jingwanrah ia ki Fast Track Court, u Bah Paul u la ong, “Ngi la rai ruh ba ka la don ka jingud jingnam na ki paidbah halor ka jingslem palat ki mukotduma kaba la ktah ia ki nongmudui bad ki nongai sakhi, kumta ruh ka sorkar jylla kan sa thoh lyngba u Myntri Rangbah ka Jylla bad ruh ban iakren bad u Chief Justice ka High Court ka Jylla khnang ban lah ban pynsted ha kaba pynkha ia ki fast track court ki ban shim ia ka jingtian bishar ia ki mukotduma man ka sngi.”

Haba kylli ha kaba iadei bad ki jingdawa jong ki kynhun Sengbhalang, u Myntri u la ong ba ki pyrto ia baroh ki jingai jingmut hynrei na ka liang ka Sorkar kan leh ia la ka jong ka kamram hynrei kan ym leh ia kano kano ka kam hapdeng ka jingshah pynbor.