Yn pynioh surok iaka shnong Khatkasla haduh Moojem ong u MLA Mowkaiaw

Syllad | The Rising MeghalayaNovember 19, 2020

U MLA jong ka Mowkaiaw u ma Nujorki Sungoh ula ong shen yn shna surok iaki shnong khappud bad ka Assam naduh na Khatkasla, Psiar haduh Moojem.

U MLA Mowkaiaw ula ong ia kane haka jingialang pynskhem nongkitkam ka Jaintia Students’ Union (JSU) haka sngi Palei ha Bosco Pnar, Jowai.

“Kala shimpor haduh 48 snem ba ka sorkar Jylla kan sngewthuh ïaka jingeh bad ka jingdonkam jong ki shnong ha khappud ban ioh iaka roi ka par naduh ban pynbiang iaka surok, ki skul, ki jaka sumar bad kiwei kiwei,” la ong u ma Nujorki Sungoh.

Ula ong ruh ba shen yn plie noh iaka skul Secondary haka shnong Psiar bad kane ka iarap iaki shnong kiba marjan ha katei ka thain khappud ban ioh iaka jingnang jingstad. Ïa kane ka skul Secondary la tei lyngba ka RMSA bad ki shnong ki ban ioh myntoi ki kynthup iaka Psiar, Khatkasla, Mowlaber kumjuh ïaki 32 tylli ki Shnong Pnar kiba hap hapoh ka Block-I.

Ha kaba iadei bad ka surok u MLA ka Mowkaïaw ula pynsngew ruh ba u don ka jingkyrmen ba ka surok naduh Khatkasla shaduh Moojem lah ban ïoh sanction lyngba ka skhim North Eastern Council.