Yn pynjur ka NEHUTA ia ka jingiakhih pyrshah ia ki jingleh bakla jong u VC ka University

Syllad | The Rising MeghalayaOctober 12, 2023

Ka North Eastern Hill University Teachers’ Association (NEHUTA) ka la shim ia ka rai ban nang pynjur ia ka jingiakhih da kaba khot pynlong da ka rally bad ka shong kyllain mungor haka 12 tarik Risaw ban pynpaw pyrshah halor kiba bun ki jingkynnoh leh bakla ha ki rukom treikam  jong u Vice Chancellor ka University u Prof PS Shukla.

Ka NEHUTA ka la aiti ruh ia ki kot ki sla kiba pyni ia kine ki kam leh thurmur bad pynkhein ain jong u Prof Shukla tang hapoh kine ki ar snem ba u la shimti ia ka kam sha ka President jong ka ri India bad ruh sha u Myntri ka Tnat pule puthi ka Sorkar pdeng ba kin tuklar lem.

Ha u kyrwoh bala phah haka sngi Balang, u president ka NEHUTA u Lakhon Kma, u la ong ba ka Seng ka la iakhun pyrshah ia une u VC khnang ban aijingiada ia ka NEHU la kalong kumno kumno ruh.

“Ngi la shim ia ka rai ban pynlong da ka rally bad shong kyllain mungor ban pynpaw pyrshah ia kine ki jingleh jong u VC. Kane ka dei ka jingkhot kaba kongsan bad la kyrpad ia baroh ba wan pyniasoh khlem pep ha kane ka jingiakhih ka ban long lashai ka sngi 12.10.2023 ha ka por 3 baje nohphaisngi hakhmat ka Library ka NEHU na ka bynta ka Rally, bad nangne yn leit tur sha ka ophis jong u na ka bynta ban bteng ia ka jingiakhih da kaba shong kyllainmungor” ong u president da kaba kyntu ruh ia ka MCTA, NEHUSU, NEHUNSA ba kin ai ka jingkyrshan bad ka jingiatreilang.

“Ngi la iakhun pyrshah ia ki jingleh bakla bad ruh ban iada ia ka hok jong ki dkhot ka Academic Council kaba u VC u pyrshang ban iuhroit. Lada ngi ailad, kan dei ka kam kaba ma shibun bad ka ban nang aibor ia u VC ban pynkhein ia baroh ki kyndon treikam ha kiba bun ki kam kiba iadei bad ka bha ka miat jong ka skulbah” ong shuh shuh u prof Kma.