Yn pynkhlain ka Sorkar ia ka jingdon ki VDP ha ki jaka ba jur ki kam drok: Paul Lyngdoh

Syllad | The Rising MeghalayaMay 29, 2024

Ka Sorkar Jylla ka la shim ia ka rai ban pynkhlain ia ka jingdon jong ki kynhun Village Defence Party (VDP) ha ki jaka kiba ki kam drok ki kham kynrei bha khnang ban lah ban rat dyngkhong ia ki kam khaii drok, dih drok bad kiwei pat ki jait jingdih pynbuaid.

Kane ka rai ka dei kaba la shim ha ka jingialang ba la khot pynlong da u Myntri ka Tnat Social Welfare u Bah Paul Lyngdoh ha ka 28 tarik Jymmang ha ka jingiadon lang ki ophisar na ka Tnat pulit, Social Welfare bad ki seng trei mon sngewbha ban bishar bniah ruh halor ka jingiaid shakhmat jong ka Drug Reduction Elimination and Action Mission (DREAM) ha kane ka thma pyrshah drok.

Haba kylli halor ki sienjam ba shipor kiba donkam kyrkieh ban tehlakam ia ka jingkynrei jong u drok, u Bah Paul u la ong, “Kawei na ki mat ba la iatai sani ka long halor ka jingpynkylla bad pynthymmai bad ruh ban pynbeit thymmai ia ki Village Defence Party (VDP) bad khamtam ruh ban ithuh ia kito ki jaka kiba u drok u kynrei bha kaba kynthup hapoh kane ka nongbah Shillong.”

“Kawei na ki mat kaba sngewkhia jur na ka bynta jong ngi ka long halor ka jingdonkam halor ka jingdonkam ban pynlong ia kane ka prokram kaba iadon bynta lang hapdeng ki shnong ki thaw. Ngim kwah ban iohi ba ka DREAM kan long tang kum ka sienjam ba la shim da ka sorkar. Kalong kaba kongsan ban rat dyngkhong ia ka jingshyrkhei jong u drok bad kiwei pat ki jait jingdih pynbuaid, ngi donkam ia ka jingiashim bynta lang da ki kynhun trei mon sngewbha bad ka imlang ka sahlang hi baroh,” u la ong.

Nalor kata u la pyntip ba ha ki artylli ki jingialang bad ki Dorbar Shnong, ka la mih ka sur ba ki shnong ki kwah ban iadon bynta lang na ka bynta ban ithuh bad ban iakhun pyrshah halor ka jingshyrkhei jong u drok. “Kumta ruh ka jingiakren mynta ka sngi ngi la pynleit jingmut na ka bynta ban pynkhlain ia ka jingdon jong ki VDP ha kylleng ki jaka ha ka Jylla,” u la bynrap.

Haba pynpaw halor ki kyndon ain, u Bah Paul u la ong ruh ba ka kamram bad ki jingtreikam jong ki VDP kin kynthup ruh na ka bynta ban iarap lem ia ki bor pulit ha ka ban pynneh ia ka suk ka sain, kata khamtam haba donkam na ka bynta ban pahara ha ki jaka ba la pynkhamti ia ki party ba kin khanglad ia ki kam tuh kam thiem, ki kam runar bad kiwei pat ki kam beain khnang ban aijingiada ia ki mynsiem briew kumjuh ia ki jingdon jingem.

“Kumta ruh ki kam drok ki hap lang ha ka bynta bad ka jingtreikam jong kine ki VDP,” u la ong da kaba bynra ba ki VDP kin ioh pdiang ruh ia ki jinghikai halor ki sienjam kaba iadei bad u drok. U Myntri u la ong ruh ba shen kin sa khot ia ka jingialang paidbah jong ki Dorbar Shnong bapher bapher ka ban sdang na ka nongbah Shillong.