Yn pynkhlain ka tnat pulit ka Jylla ia ki kam pahara ha ka iingbishar Meghalaya High Court

Syllad | The Rising MeghalayaJune 28, 2024

U Deputy Inspector General of Police (Eastern Range) u Davis NR Marak ha ka 27 tarik mynta u bnai u la ong ba ka Tnat pulit ka Jylla ka la shim ia ki sienjam ban pynkhlain ia ki bor pahara ha ka iingbishar Meghalaya High Court lem bad kiwei pat ki jaka treikam ba kongsan ka Sorkar Jylla.

Lah ban kdew ba ha ka 18 tarik Jylliew, ka iingbishar Meghalaya High Court ka la ngat ha ka jingshah byrthen pynbthei bom ha ka sien kaba ar lyngba ka email. Ka sien byrngem kaba nyngkong ka la jia ha ka 6 tarik u Kyllalyngkot mynta u snem.

Haba kren sha ki lad pathai khubor u Marak u la ong, “Ngi la phah ia ka kynhun bomb squad jong ngi ban pynshisha. Hynrei, la iohi ba kane ka jingbyrngem ka dei kaba shu thok. Kumta kam shym la don satia ka jingujor ejahar.”

“Hynrei, watla katta ngi la shimkhia halor ka jingshngain jong kane ka iingbishar bad kiwei pat ki jaka treikam ba kongsan. Ha ka jingshisha ngi la pynlong ruh ia buntylli ki jingiakren ha kaba iadei bad ka jingpynkhlain pahara ia ki jaka treikam bad ki jingtei ba kongsan ka sorkar bad ngin btengban shimkhia halor kane ka bynta,” u la bynrap.

Nalor kata u la pyntip ba ka mat kaba iadei ba ka jingshngain kan dei kawei na ki mat ba kongsan ban iakren ha ka SsP-Cos Conference ka ban long naduh lashai ka 28 tarik ha Police Headquarter.

“Ngi la dep ban iakren halor ki sienjem ban pynkhlain ia ka jingpahara hapoh ka iingbishar High Court bad ngin sa iakren bniah ia kane ka kam ha katei ka jingialang,” ong shuh shuh une u heh pulit.