Yn pynkhuid paidbah ïaka Wah Myntdu ha Jowai

Syllad | The Rising MeghalayaApril 7, 2021

Ka Synjuk Waheh Shnong Jowai kan pynlong ïaka jingpynkhuid iaka wah Myntdu kaba la tip kum “Wah Myntdu Mass Cleaning Drive” naduh Liar Mookdiang haduh Pohkhyllem ka bynta jong ka Wah Myntdu haka 10 tarik une u bnai Ïaiong.

Hashwa ka jingpynkhuid kan don ka jingïalang lyngkot ha madan Chad Sukra, Īawmusiang Jowai ha kapor 9:30 baje mynstep haka jingïadonlang u Deputy Commissioner, West Jaiñtia Hills District u Garod LSN Dykes, IAS.

Hadien ka jingpynkhuid kan don biang ka jingïalang haka por 1:00 nohphai sngi ha Kroh Ksiar Pynthorwah Panaliar ha kaba u P War, Chairman, Jowai Municipal Board West Jaiñtia Hills District, Jowai un long u kongsan.

Ka Synjuk Waheh Shnong Jowai ka khot ïa baroh ki seng treimon sngewbha, ki seng Niam bad baroh ki jait seng bapher bapher ryngkat ki riew shimet, ki shnong ba don shajan jong ka Wah Myntdu ban ïa snohktilang ha katei ka sngi.

Ka synjuk ka kyntu ïaki nongkhwai, kiba trei ba ktah ha baroh shilynter ka Wah Myntdu ba kin sangeh ha ka por ba don ka jingpynkhuid.